Kurti përgënjeshtron deklaratën e Vuçiqit: Kjo është gënjeshtër, ai po gënjen
Kryeministri i Kosovës, Albin Kurti tha se presidenti i Serbisë, Aleksandar Vuçiq gënjeu kur tha se pala e Kosovës refuzoi të pajtohet për një çështje, raporton Gazeta Express.
I pyetur për t’i komentuar deklaratat e Vuçiqit se Kurti nuk u pajtua për disa çështje, dhe njërën veçanërisht atë të deklaratës ku palët zotohen të përmbahen nga veprimet që mund të krijojnë tensione në terren, Kurti tha se Vuçiq po gënjen.
“Kjo është gënjeshtër. Pra, ai që ua ka thënë këtë… Ai po gënjen. Përkundrazi, ne kemi kërkuar që të futet edhe fjala paqe dhe stabilitet, jo vetëm siguri”, tha Kurti para gazetarëve në Bruksel.
Ai shtoi se nuk është e lehtë të dialogosh me palën serbe, ndërsa tha se Serbia s’është e gatshme të përballet me të kaluarën.
“Nuk është kollaj, për shkak se nuk ekziston gatishmëria, përveçse interesi nga Serbia që të ballafaqohet me të kaluarën”, tha Kurti.
Ai përmendi sërish mospërjashtimin e kryetarit të komisionit qeveritar serb për personat e pagjetur, Veljko Odalloviq, duke thënë se kësisoj nuk tregohet gatishmëri për pajtim.
