Përgjimet/ Ky gazetar pranon të publikojë lajme me pagesë të porositura nga “agjenti rus”

Biseda telefonike e siguruar nga Gazeta Online Shqip.com vë në pah shkeljen më të madhe profesionale që një gazetar mund të bëjë brenda profesionit, sipas Kodit të Mediave të Shkruara në Kosovë.

Autori i emisionit “InDoks” dhe redaktori i portalit Insajderi Visar Duriqi, pranon që të publikojë lajme me pagesë. Porositësi është Halit Sahitaj, të cilin vetë Duriqi në emisionin e tij e kishte portretizuar si agjent i dyshuar rus. Duriqi veç çmimin për lajm nuk mund ta vendosë vetë. Prandaj, i thërret në konsultë eprorët e tij.

Biseda telefonike e siguruar nga Gazeta vë në pah shkeljen më të madhe profesionale që një gazetar mund të bëjë brenda profesionit, sipas Kodit të Mediave të Shkruara në Kosovë.

Visar Duriqi, autor i emisionit “InDoks”, në këtë bisedë futet në pazar lajmesh me Halit Sahitajn, të cilin vetë portali Insajderi në një dokumentar e kishte portretizuar si njeri të dyshuar që punon për shërbime sekrete ruse.

Dokumentari i emisionit “InDoks”, e prezanton Sahitajn si oligark, derisa më pas argumentohet se ka dyshime të mëdha që ai është edhe agjent rus.

Në telefonatën e realizuar në verën e vitit 2020, Duriqit i kërkohet nga Sahitaj të publikojë disa lajme me pagesë. Duriqi, në anën tjetër, i referohet Sahitajt si “Boss”.

Dhe “Boss-i” i porositë – si në market – tri lajme. Por, paraprakisht e siguron Duriqin se “çka t’dush t’jepi, veç fol edhe menjihere dikuj i thom me t’i pru aty”.

Pas kësaj Duriqi e pyet se “për çka janë artikujt?”.

“Njo osht për Lumezin, njo osht për Behgjet Pacollin edhe njo osht për institucionin e konfiskimit t’kerreve”, bën porosinë e tij Sahitaj.

Duriqi konfirmon me një; “ëhë”, derisa përfundimisht pranon ofertën.

“Çomi, t’i shty përpara me kta t’mit”.

Nga biseda kuptohet se Duriqi e Sahitaj komunikimin e kishin të vazhdueshëm. Në një vend ai i thotë Sahitajt se ka provuar ta thërras në “Whats App”, porse nuk ka arritur të lidhet me të.

Sahitaj i tregon se tashmë nuk e ka më atë numër, porse i premton se një tjetër të ri do t’ia kalojë shpejt.

Gjithsesi, pajtimin fillestar për publikimin e lajmeve me pagesë e përcjell më pas një dilemë nëse fillimisht duhet të caktohet çmimi i “lajmeve”, apo të shihen paraprakisht artikujt.

“Hajt pra çomi artikujt nëse i ke gati”, thotë Duriqi.

“Ja njiher kallxom, kallxom sa edhe unë tashi t’i çoj krejt”, këmbëngul “Bossi”.

Duriqi e ka të pamundur ta këpus vetë pazarin. Për çmimin final pohon se i duhet një konsultim me eprorët e tij.

“Ani shef, qe flas me ata t’mit e t’kallxoj”.

Bosi, apo shefi – dy epitetet me të cilat i referohet Duriqi Sahitajt– duket se e ka me nguti, andaj përgjigjen e do shpejt.

“Veç kallxom sot, a u bo?”.

“U kry njeri”, përgjigjet autori i emisionit InDoks. Emision për të cilin thuhet se prodhon dokumentarë investigativë. Edhe vetë Duriqi thotë se është gazetar hulumtues.

Ajo çfarë pranon të bëjë Duriqi bashkë me shefat e tij, është pranim i mitos.

Pranimi i mitos – parave – për të publikuar lajme është i dënueshëm rëndë me Kodin e Mediave të Shkruara në Kosovë.

Në kreun e VIII të kodit (korrupsioni dhe mitoja) thuhet se gazetarët e kanë të ndaluar të pranojnë mito, veç tjerash, që komprometon kredibilitetin e tyre moral dhe profesional, shkruan gazeta shqip. Madje, sipas të njëjtit kod, gazetarët nuk bën të pranojnë as “akte specifike të zemërgjerësisë të cilat do të mund të ndikojnë në pavarësinë e tyre profesionale”./shqip.com