Rama do të takohet me Blinken/ Kryeministri vizitë në SHBA në 14 dhe 15 shkurt

Gjatë vizitës në Shtetet e Bashkuara të Amerikës në 14 dhe 15 shkurt, kryeministri Edi Rama do të ketë një takim me sekretarin amerikan të shtetit Antony Blinken.

Kreu i qeverisë do të jetë në Amerikë në kuadër të nisjes së mandatit të Shqipërisë në Këshillin e Sigurimit në Organizatën e Kombeve të Bashkuara. Gjatë qëndrimit atje, Edi Rama do të zhvillojë në Uashington edhe takimin me zyrtarin e lartë amerikan.

Pak ditë më parë, kryeministri Edi Rama, duke iu referuar tensioneve mes Ukrainës dhe Rusisë, lajmëroi se do të dëgjojmë një lajm të jashtëzakonshëm mbi rolin e vendit tonë.

Mbetet për t’u parë se cili është qëllimi i takimit dhe çfarë do të prodhojë ai për vendin tonë. Takimi i Ramës me Blinken vjen edhe pas shpalljes së ish-kryeministrit Sali Berisha “non grata” dhe ashpërsimit të retorikës së tij ndaj SHBA-ve.