Rama pas takimit me Thaçin: Ishte në top formë dhe i bindur në pastërtinë e luftës së UÇK
Për gati 3 orë kanë biseduar bashkë në Haaglanden, në dhomat e paraburgimit në Hagë, Kryeministri Edi Rama dhe ish-presidenti, ish-Kryeministri i Kosovës e ish-komandantit të UÇK-së, Hashim Thaçi. Në takimin që Rama e konsideroi një çmallje e nevojshme, ai tha se e pa Thaçin të fortë dhe të bindur më shumë se kurrë se kjo është sprova e radhës për t’i treguar botës më hapur se kurrë pastërtinë e luftës së shqiptarëve të Kosovës për liri.
Rama nënvizoi edhe një herë se lufta çlirimtare e Kosovës nuk mund të rishkruhet as nuk mund kurrsesi të futet në korniza të tjera.
“Ishte një çmallje e nevojshme. Presixdentin Thaçi e gjeta në top formë. I bindur se kjo ishte një rrugë e pashmangshme për të provuar katërcipërisht para gjobës pastërtinë e plotë të luftës së çlirimtare, pastërtinë e idealit të luftëtarëve të të udhëheqësve të UÇK. Natyrisht që të gjithë jemi ne të bindur se lufta çlirimtare e Kosovës nuk mund të rishkruhet as nuk mund kjurrsesi të futet në korniza të tjera. Ajo është tanimë e futur në kornizën e artë të heroizmit, sakrificave, të gjakut të dhënë”, tha Rama.
Ky takim vjen pasi ish-presidenti Hashim Thaçi u paraqit sot paradite para Gjykatës Speciale për shkak të aktakuzës së re, të ndryshuar, të cilën Prokuroria e Specializuar e dorëzoi së fundmi në gjykatë. Thaçi tha se nuk i ka kuptuar akuzat e reja, por tri herë u deklarua i pafajshëm.
Zyra e Prokurorit të Specializuar të premten e ka dorëzuar në Gjykatën Speciale një aktakuzë të re, të ndryshuar, kundër ish-presidentit Hashim Thaçi, ish-kreyparlamentarëve Kadri Veseli e Jakup Krasniqi, si dhe ish-deputetit të Lëvizjes Vetëvendosje, Rexhep Selimi, të gjithë drejtues të luftës për liri të Kosovës.
