Ministri çek: Është nder ta pranojmë aplikimin e Kosovës për anëtarësim në BE

Ministri i Çekisë për çështje evropiane, Mikulash Bek ka mirëpritur dorëzimin e aplikimit të Kosovës për anëtarësim në BE në Pragë.

Ai ka thënë se është nder për të që të pranojë aplikimin e Kosovës për anëtarësim në BE.

Ministri çek në konferencën e përbashkët që po mbahet në Pragë së bashku me kryeministrin e Kosovës, Albin Kurti ka thënë se mirëpret edhe avancimin që është bërë në çështjen për liberalizimin e vizave për Kosovën.

Ndër të tjera ai ka thënë se presidenca çeke në 6 muajt e fundit i ka vënë vëmendje të jashtëzakonshme Ballkanit Perëndimor.

“Vlerësojmë dhe çmojmë arritjet e bëra të Kosovës deri më tani, më vjen mirë që duke plotësuar një nga prioritetet e presidencës sonë, gjashtë muajit e fundit kemi mbajtur mbledhje të jashtëzakonshme për Ballkanin Perëndimor, na vjen mirë që kemi arritur të avancojmë tutje në çështje të ndërlikuara, si liberalizimi i vizave për Kosovën dhe që kemi arritur të kemi konsensus me Parlamentin Evropian për këtë çështje të liberalizimit të vizave”, ka thënë Bek.

Ndryshe, Kosova, të enjten e 15 dhjetorit, ka aplikuar për anëtarësim në Bashkimin Evropian.

Kryeministri i Kosovës, Albin Kurti, ka dorëzuar aplikimin në Republikën çeke, vendin që aktualisht kryeson Presidencën e BE-së.

Ceremonia e dorëzimit është mbajtur në ndërtesën e Qeverisë çeke, në Pragë.

Dnes jsem jako zástupce @EUCouncil převzal z rukou kosovského premiéra @albinkurti oficiální přihlášku 🇽🇰 do 🇪🇺. Evropská perspektiva je pro region západního Balkánu silnou zárukou míru a prosperity. pic.twitter.com/FMtFRn96wM

— Mikuláš Bek (@MikulasBek) December 15, 2022