Presidentja Osmani: Republika jonë është e shenjtë dhe duhet ta ruajmë si të tillë
Presidentja e Kosovës, Vjosa Osmani, i ka quajtur pasardhës të Ushtrisë Çlirimtare të Kosovës ushtarët FSK-së dhe Policisë së Kosovës. Në parakalimin e Trupave të Forcës të Sigurisë së Kosovës dhe Policisë së Kosovës, Osmani ka thënë se Kosova është e shenjtë dhe si e tillë duhet të ruhet.
Presidentja Osmani ka thënë se periudha nëpër të cilën po kalon Kosova ka shumë sfida, shkaku i krizave globale.
“Vajzat dhe djemtë e policisë sonë do të parakalojnë edhe në sheshin e Ibrahim Rugovës, i cili po na shikon nga lart dhe është shumë krenar. Këta vajza e djem janë pasardhësit e UÇK-së që e mbrojtën dhe e formuan shtetin tonë. Një falënderim shumë i madh shkon edhe për miqtë tanë. Faleminderit ShBA-së, aleatit tonë të përjetshëm. Faleminderit të gjitha shteteve të NATO-s dhe shteteve tjera mike të Kosovës”, ka thënë Osmani
“Periudha që po kalon shteti jonë me sfida dhe kriza globale. Republika jonë është e shenjtë dhe duhet ta ruajmë si të tillë. Republika e Kosovës është e përjetshme. Zoti e bekoftë ushtrinë dhe policinë tonë, zoti e bekoftë Kosovën dhe qytetarët”, u shpreh Osmani
Presidentja e Republikës së Kosovës, Vjosa Osmani Sadriu së bashku me Zotërinë e Parë të Kosovës Prindon Sadriu, me Presidentin e Republikës së Shqipërisë Bajram Begaj, Zonjën e Parë të Shqipërisë, Armanda Begaj, kryetarin e Kuvendit, Glauk Konjufca, kryeministrin Albin Kurti si dhe me zëvendëskryeministra dhe ministra të Qeverisë së Republikës së Kosovës, kanë marrë pjesë në ngritjen solemne të Flamurit të Republikës së Kosovës.
“Republika e Kosovës është e përjetshme”, ka shkruar Presidentja Osmani.
