2030, mundësi reale për Maqedoninë e Veriut dhe Shqipërinë për ta rrumbullakuar me sukses integrimin europian

Ministri i Punëve të Jashtme i Republikës së Maqedonisë së Veriut, Bujar Osmani, sot realizoi takim me Ministren për Evropën dhe Punët e Jashtme të Republikës së Shqipërisë, Olta Xhaçka, e cila qëndron për vizitë zyrtare në vendin tonë.

Në takim u konstatua dinamika e shkëlqyer në bashkëpunimin bilateral dhe u rikonfirmuan zotimet e ndërsjella për pasurimin e tij me përmbajtje dhe projekte të reja, në interes të dy vendeve fqinje dhe qytetarëve. Theksi u vu në proceset e reformave të integrimit evropian, që po zhvillohen me ritme të pandërprera në të dy shtetet.

“Këtë vit shënojmë 30 vjetorin e vendosjes së marrëdhënieve diplomatike – tri dekada të afërsisë, miqësisë dhe sukseseve. Ky partneritet dhe kjo miqësi e fortë u demonstrua shumë qartë në periudhën para fillimit të negociatave të anëtarësimit në Bashkimin Evropian, kur shumica e parashikuan mundësinë që Shqipëria të vazhdonte e vetme në këtë rrugë. Sinqerisht e vlerësojmë sjelljen dhe para se gjithash durimin e Tiranës zyrtare, e cila edhe publikisht shprehu mirëkuptim për qëndrimin tonë gjatë asaj periudhe”, tha Osmani.

Të dy vendet së bashku dhe me sukses kalojnë nëpër procesin e skriningut, përmes zbatimit të reformave të brendshme, drejt anëtarësimit të plotë në Bashkimin Evropian deri në vitin 2030, si një mundësi reale dhe e arritshme, shtoi ai.

Në mënyrë të veçantë iu referuan bashkëpunimit rajonal dhe marrëveshjes së arritur së fundmi ndërmjet Kosovës dhe Serbisë. Me këtë rast, u theksua mbështetja e fuqishme e Maqedonisë së Veriut dhe Shqipërisë për zbatimin e plotë dhe joselektiv të dispozitave të marrëveshjes dhe aneksit të Ohrit.

Në prag të takimit ministror të nesërm në kuadër të ShBA-Karta e Adriatikut (A5), ministrat vlerësuan lart bashkëpunimin në kuadër të NATO-s, ku partneriteti dhe aleanca jonë demonstrohen çdo ditë, si dhe riafirmuan politikën e dyerve të hapura me shtetet e reja anëtare.

Shkup, Kënaqësi të takoj kolegun dhe mikun tim të mirë, Ministrin e Punëve të Jashtme të Republikës së Maqedonisë së Veriut, Bujar Osmani.
Biseduam për marrëdhëniet shumë të mira dypalëshe që ekzistojnë mes dy vendeve tona. Shqipëria dhe Maqedonia e Veriut janë një model i bashkëpunimit fqinjësor në Ballkanin Perëndimor dhe mipëresim të punojmë ngushtë së bashku për t’i intensifikuar dhe zgjeruar më tej këto marrëdhenie.
Në fokus të bisedës ishte edhe situata në rajonin e Ballkanit Perëndimor në kontekstin e agresionit të paligjshëm të Rusisë kundër Ukrainës .
Ramë dakort që integrimi Euro-Atlantik i Ballkanit Perëndimor është garancia më e mirë e stabilitetit të rajonit tonë dhe Evropës .