Osmani: Sot në Shkup lançojmë platformë të re – QUAD i Ballkanit Perëndimor – harmonizim 100% me Politikën e Jashtme të BE-së
Në Shkup u lansua nisma e katër shteteve të Ballkanit Perëndimor të cilat kanë rreshtuar 100% politikën e Jashtme dhe të Sigurisë me atë BE-së – QUAD
Nën organizimin e ministrit të Jashtëm të Maqedonisë së Veriut, Bujar Osmani, në Shkup u lansua nisma e katër shteteve të Ballkanit Perëndimor, të cilat kanë rreshtuar 100 për qind politikën e jashtme dhe të sigurisë me atë BE-së, QUAD.
Në njoftimin e Ministrisë së Punëve të Jashtme dhe Diasporës thuhet se nisma jo formale është në përbërje të Shqipërisë, Kosovës, Maqedonisë së Veriut dhe Malit të Zi.
“Ky kuadrat i shteteve vijon të përafrojë në vazhdimësi dhe të përditësojë çdo politikë të Jashtme e të Sigurisë së BE-së dhe ShBA-ve, veçanërisht në vendosjen e sanksioneve ndaj Rusisë, si rrjedhojë e agresionit të paprovokuar të Rusisë në Ukrainë”.
Shtetet me qëndrim të tillë do të vijojnë komunikimin dhe bashkëpunimin në funksion të mirëmbajtjes së kësaj trajektoreje përafruese me botën perëndimore. Krahas nikoqirit, ministrit Osmani, pjesë e nismës ishte zëvendësministri i Punëve të Jashtme dhe Diasporës së Kosovës, Kreshnik Ahmeti, ministrja për Evropë dhe Punë të Jashtme e Shqipërisë, Olta Xhaçka, dhe këshilltari për Politikë të Jashtme i Malit të Zi, Gjorgje Raduloviq.
Postimi nga Osmani:
Sot në Shkup lançojmë platformë të re – QUAD i Ballkanit Perëndimor – harmonizim 100% me Politikën e Jashtme të BE-së.
Në fokus: harmonizimi i plotë i Maqedonisë së Veriut, Shqipërisë, Kosovës dhe Malit të Zi me Politikën e Përbashkët të Jashtme dhe të Sigurisë të BE-së në dritën e realitetit të ri gjeopolitik, kërcënimeve hibride, krizës energjetike dhe pasojave ekonomike të shkaktuara nga invazioni rus ndaj Ukrainës.
Secili prej këtyre vendeve, është dëshmuar partner i besueshëm i NATO-s dhe BE-së.
Qëllimi i përbashkët strategjik i të gjitha vendeve të cilat kanë arritur harmonizim të plotë me vendimet e BE-së parqet integrim të plotë në Union.
