Ambasadorja Aggeler del në mbështetje të ministrit Krenar Lloga
Ambasadorja e SHBA-ve në Shkup, Angela Price Aggeler në një prononcim ekskluziv për Alsat, ka përsëritur kritika të rënda ndaj Këshillit Gjyqësor duke mbështetur kështu deklarimet e ngjajshme të Ministrit të Drejtësisë, Krenar Lloga.
Duke folur mbi zhvillimet në Këshillin Gjyqësor dhe veprimet e këtij organi në raport me presionet politike ndaj Gjykatës Supreme ka potencuar se këshilli nuk ka arritur t’i përmbush plotësisht detyrimet e parapara ligjore dhe se kjo nuk është drejtësia që e presin njerëzit e këtij vendi.
“Këshilli Gjyqësor- ne teori një organ i pavarur- mban përgjegjësinë vendimtare për emërimin e gjykatësve të kualifikuar dhe disiplinimin e atyre që nuk arrijnë të përmbushin standardet më të larta. Është mandati i Këshillit të sigurojë funksionimin e duhur dhe transparent të gjyqësorit në këtë vend. Më vjen keq të them se ne kemi parë pak prova të përmbushjes së këtyre detyrave të shenjta. Qytetaret e këtij vendi meritojnë më mirë”, deklaroi Angela Price Aggeler, Ambasadore e SHBA-ve në Shkup.
Aggeler duke folur për vjetërsimin e akuzave në rastin TNT tha pret nga Gjykata e Apelit të jetë në krye të përmbushjes së detyrimeve ligjore. Shefja e diplomacisë amerikane në vend thotë se akoma nuk ka informacion për vendimin e Apelit, por shton se gjykata e shkallës së dytë duhet të vendos në përputhje me ligjin.
“Nuk e kam parë vendimin e Gjykatës së Apelit për pushimin e akuzave për rastin TNT, por do ta shqyrtojmë me kujdes, me shpresë që vendimi është transparent dhe në përputhje me ligjin”, tha Angela Price Aggeler, Ambasadore e SHBA-ve në Shkup.
Komentet e Aggeler vijnë pak ditë pasi ajo zhvilloi takim pune me kryetaren e Gjykatës Supreme, Besa Ademi e cila publikisht denoncoi presionet politike të ushtruara ndaj saj dhe institucionit me të cilin udhëheq ajo, posaçërisht pas kërkesës për kthimin në fuqi të abolimit nga viti 2016.
