Ministrat e mbrojtjes të NATO-s në mblidhen Bruksel për të diskutuar mbështetjen për Ukrainën
Ministrat e mbrojtjes të vendeve anëtare të NATO-s u mblodhën sot në Bruksel për të diskutuar mbështetjen e tyre për Ukrainën, raporton Anadolu.
“Ne do të adresojmë nevojat urgjente për më shumë furnizime, armë të mbrojtjes ajrore, municione”, tha Sekretari i Përgjithshëm i NATO-s Jens Stoltenberg në pragun e samitit dyditor.
“Unë pres që ministrat e NATO-s do të bien dakord për një plan për ndihmën dhe trajnimin e sigurisë të NATO-s për Ukrainën. Dhe ne do të diskutojmë gjithashtu një premtim financiar afatgjatë për të cilin pres që udhëheqësit aleatë të bien dakord në samitin e NATO-s në korrik”, tha ai.
I pyetur për dërgimin e sistemit të mbrojtjes ajrore Patriot në Ukrainë, Stoltenberg tha se vendet aleate po “punojnë shumë” për këtë çështje.
“Pres që aleatët të bëjnë një njoftim në ditët dhe javët në vijim”, tha ai.
I pyetur për qëndrimin e Hungarisë ndaj konfliktit në Ukrainë, shefi i aleancës tha se vendi “nuk do të jetë pjesë e zotimit financiar”, por nuk do të bllokojë aleatët që të ecin përpara me planin.
Hungaria do të vazhdojë të përmbushë “të gjitha detyrimet e tjera të NATO-s”, theksoi Stoltenberg, duke vënë në dukje se qëllimi është “të minimizohet rreziku për boshllëqe dhe vonesa”.
Ai kujtoi se në fillim të këtij viti, vonesat në mbështetjen ushtarake si nga SHBA-ja, ashtu edhe nga disa aleatë evropianë, “bënë një ndryshim në fushën e betejës” dhe lejuan Rusinë të përparojë dhe “në fakt të pushtojë më shumë territor në Ukrainë”.
Stoltenberg, në një pyetje në lidhje me situatën aktuale politike të brendshme në Francë, tha se ai pret që Parisi “të mbetet një aleat i vendosur dhe i rëndësishëm edhe në të ardhmen”.
Presidenti francez Emmanuel Macron njoftoi zgjedhje të parakohshme pas humbjes së bllokut të tij centrist dhe fitores së ekstremit të djathtë në zgjedhjet e BE-së të dielën. Partitë politike filluan të punojnë për zgjidhje të ndryshme për krijimin e aleancave, gjë që çoi në një krizë brenda partive të djathta.
