Gashi në Ditën e Alfabetit: Shqiptarët janë shtetformues, angazhohem për trajtimin e shqipes me barazi dhe respekt

ME rastin e Ditës së Alfabetit të Gjuhës Shqipe, kryetari i Kuvendit të Maqedonisë së Veriut, Afrim Gashi ka uruar të gjithë shqiptarët dhe shtoi se, për të, kjo ditë paraqet një thelb të pashkëputur të identitetit të tij që e bën krenar.

Gashi tha se, këtë festë dhe gjuhën shqipe, i vlerëson si gurthemel të shoqërisë dhe diversitetit etnik.

“Në Ditën e Alfabetit të gjuhës shqipe kujtojmë dhe nderojmë këtë moment historik, që shënon përfundimin e Kongresit të Manastirit dhe mishëron identitetin e popullit shqiptar.

Si Kryetar i Kuvendit të Maqedonisë së Veriut, ku shqiptarët janë popull shtetformues, e vlerësoj këtë festë dhe gjuhën shqipe si gurthemel të shoqërisë dhe diversitetit etnik, ndërsa angazhohem për të siguruar që ajo të trajtohet me barazi dhe respekt në çdo nivel të jetës institucionale dhe shoqërore. Ndërkaq, për mua si shqiptar kjo ditë paraqet një thelb të pashkëputur të identitetit tim, që më bën krenar.

Të gjithë shqiptarëve kudo në botë, gëzuar 22 Nëntorin”, tha Gashi