Operacion i madh Shqipëri-Kosovë, sekuestrohen mbi 60 armë (Video)
Operacioni i përbashkët midis autoriteteve të Shqipërisë dhe Kosovës, kundër trafikimit të armëve nga Kosova në Shqipëri.
Operacioni i gjerë policor është zhvilluar në të dyja vendet, duke shënuar një goditje të rëndësishme ndaj aktiviteteve të paligjshme.
Sipas informacioneve paraprake, gjatë aksionit janë sekuestruar mbi 60 armë zjarri, ndërsa janë arrestuar 14 persona të dyshuar për përfshirje në këtë rrjet kriminal. Nga të arrestuarit, 6 janë ndaluar në Shqipëri, ndërsa 8 të tjerë në Kosovë.
Autoritetet e të dyja vendeve kanë theksuar rëndësinë e këtij operacioni të përbashkët, duke e cilësuar atë si një hap domethënës në luftën kundër trafikimit të paligjshëm të armëve.
Në vijim për operacionin pritet dhe një konferencë e përbashkët për shtyp me përfaqësues nga policia e Shqipërisë dhe e Kosovës.
Zbulohen detaje të reja nga aksioni i madh që çoi në shkatërrimin e grupit kriminal të trafikut të armëve Kosovë-Shqipëri
Një operacion i përbashkët mes autoriteteve të drejtësisë së Shqipërisë dhe Kosovës ka bërë të mundur shkatërrimin e një grupi kriminal që trafikonte armë, ndërsa janë lëshuar 14 urdhërarreste.
Prokuroria në Shqipëri ka dhënë më shumë detaje për rastin. Sipas njoftimit, hetimet datojnë qysh në muajin shkurt të këtij viti. Nga hetimet e deritanishme, rezulton se të dyshuarit ishin përgjegjës për furnizimin, transportin dhe shitjen e armëve ose materialeve shpërthyese, duke krijuar një rrugë të ndërlikuar importi dhe eksporti.
Gjatë hetimeve në kuadër të operacionit “Çmontimi”, janë sekuestruar në total 64 armë zjarri dhe municion luftarake, prej tyre 23 armë janë sekuestruar nga shërbimet e Drejtorisë Vendore të Policisë Tiranë dhe 41 armë janë sekuestruar në Kosovë.
“Hetimet datojnë në muajin shkurt të këtij viti, ku pas informacioneve të grumbulluara ne rrugë operative nga ana e Seksionit Për Hetimin e Trafiqeve të Paligjshme në Drejtorinë Vendore të Policisë Tiranë për dyshimin se shtetesi V.O. në bashkëpunim me persona të tjera, shtetas Shqiptarë dhe Kosovarë, kryejnë aktivitetin e paligjshëm të trafikimit të armëve të zjarrit nga Kosova në drejtim të Shqipërisë si dhe trafikimin e lëndëve narkotike kryesisht kokainë nga Shqipëria në Kosovë, u regjistrua procedimi penal nr.1167 për veprën penale ‘Trafikimi i armëve dhe i municionit’ kryer në bashkëpunim dhe ‘Prodhimi dhe mbajtja pa leje e armëve luftarake dhe municionit’ parashikuar nga nenet 278 dhe 278/a/2 të Kodit Penal.
Nga hetimet e deritanishme, rezulton se të dyshuarit ishin përgjegjës për furnizimin, transportin dhe shitjen e armëve ose materialeve shpërthyese, duke krijuar një rrugë të ndërlikuar importi dhe eksporti”, bëhet e ditur në njoftim.
Duke qenë se ky grup përbëhej nga shtetas nga Kosova dhe Shqipëria, institucionet e dy shteteve nënshkruan në qershor të këtij viti ‘Marrëveshjen për Themelimin e Ekipit të Përbashkët Hetimor’, mbështetur nga EUROPOL dhe nga Projekti i EUROJUST për vendet e Ballkanit Perëndimor dhe midis rajonit dhe BE-së në luftën kundër krimit të organizuar dhe terrorizmit. Nëpërmjet këtij ekipi, autoritetet shqiptare dhe kosovare mundën të bashkëpunonin shpejt dhe lehtë, duke shkëmbyer informacione në kohë reale.
Sipas njoftimit, në vijim të hetimeve, më datë 10.12.2024 rreth orës 21:00 dhe në vijim Policia e Kosovës në funksion të procedimit të përbashkët ka zhvilluar operacione policore ku ndër të tjera janë gjetur dhe sekuestruar: 29 pistoleta dhe 3 armë të gjata të modeleve të ndryshme, 2635 fishekë/municion të modelit të ndryshëm, 2 automjete dhe pajisje tjera TIK. Ndërkohë që gjatë këtyre operacioneve u ndaluan/arrestuan 8 persona. Konkretisht shtetasit V.O., K.K., S.H., Sh.J., A.H., Z.A., A.D., dhe B.A.
Në koordimin me Policinë e Kosovës menjeherë rreth orës 03.00 e në vijim të datës 11.12.2024 nën drejtimin e Prokurorisë Pranë Gjykatës Shkallës Parë të Juridiksionit të Përgjithshëm Tiranë, në funksion të këtij procedimi u zhvillua operacioni për ekzekutimin e urdhrave të ndalimit për 6 persona dhe kontrolli i banesave për 7 vende. Gjatë këtij operacioni u ndaluan për veprat penale “Trafikimi i armëve dhe municionit” e kryer në bashkëpunim dhe “Trafikimi i armëve dhe municionit” e kryer në bashkëpunim të parashikuar nga neni 278/5/ dhe 278/a/2 i K.Penal të 6 personave: E.M 20-vjeç E.P. 34-vjeçn A.M. 28 vjeç Ll 22 vjeçK.M. 26-vjeç; dhe T.Sh., 53-vjeç
Gjatë këtij operacioni u sekuestruan 22 armë zjarri ‘Zoraki’, një armë zjarri Ak 47, një granatë dore ofensive dhe 470 fishekë të llojeve të ndryshme. Gjithashtu u sekuestruan edhe 3 automjete dhe shuma të konsiderueshme parash e 10 aparate celulare”, bëhet e ditur në njoftim.
Ndërkohë, mediat në Shqipëri raportojnë se ky grup armët i merrnin nga Turqia dhe modifikoheshin në Kosovë, ndërsa pjesa tjetër merrej nga Serbia.
Transporti i tyre bëhej me autobusë dhe automjete të vogla, ndërsa secila nga armët shiteshin nga 800 deri në 1 mijë euro. Grupi nuk trafikonte armë vetëm në Shqipëri, por edhe nga Kosova drejt vendeve të Bashkimit Evropian.
