Udhëheqësi i rebelëve sirian zotohet të mbyllë burgjet famëkeqe të Assadit
Forcat rebele siriane kanë thënë se planifikojnë të mbyllin burgjet famëkeqe të drejtuara nga presidenti i rrëzuar Bashar al-Assad dhe të ndjekin ata që janë përfshirë në vrasjen ose torturimin e të burgosurve.
Udhëheqësi rebel Ahmed al-Sharaa, i njohur gjithashtu si Abu Mohammed al-Jolani, tha gjithashtu se do të shpërndante forcat e sigurisë të regjimit të mëparshëm, në një deklaratë të parë nga agjencia e lajmeve Reuters.
Videot që tregojnë mijëra të burgosur duke u liruar nga burgu Saydnaya – i referuar si një “thertore njerëzore” nga grupet e të drejtave të njeriut – u shfaqën pas rënies së qeverisë së Asadit të dielën.
Pothuajse 60,000 njerëz u torturuan dhe u vranë në burgjet e drejtuara nga Assad, tha grupi monitorues me bazë në Mbretërinë e Bashkuar, Observatori Sirian për të Drejtat e Njeriut.
Grupi militant islamik i Jolanit, Hayat Tahrir al-Sham (HTS), udhëhoqi fraksionet e tjera rebele siriane në një ofensivë të rrufeshme që rrëzoi sundimin 54-vjeçar të dinastisë Assad.
Assad u largua në Rusi në orët e para të së dielës, ku ai dhe familja e tij kanë marrë azil, pasi rebelët pushtuan kryeqytetin Damaskun.
Në një deklaratë të veçantë, Jolani tha se nuk mund të flitej për falje për ata që morën pjesë në torturimin ose vrasjen e të burgosurve.
“Ne do t’i ndjekim ata në Siri dhe kërkojmë nga vendet që të dorëzojnë ata që ikën në mënyrë që të arrijmë drejtësinë”, tha ai.
Që nga rënia e presidentit Bashar al-Assad, sirianët kanë nxituar drejt burgjeve famëkeqe të regjimit, duke kërkuar dëshpërimisht për të dashurit e tyre.
Në një raport të vitit 2022, Shoqata e të Paraburgosurve dhe të Zhdukurve në Burgun e Saydnaya (ADMSP) me bazë në Turqi, tha se Saydnaya “u bë në mënyrë efektive një kamp vdekjeje” pas fillimit të luftës civile në 2011.
Jolani tha gjithashtu se do të shpërndajë forcat e sigurisë të ish regjimit të Asadit. Nuk është e qartë se sa shpejt ato mund të rikonstituohen nga luftëtarët rebelë, mes shqetësimeve për sulmet izraelite në infrastrukturën ushtarake të vendit.
