Microsoft kërkon të blejë TikTok?/ Deklarata e Trump parashtron hipotezën e mundshme
Presidenti i SHBA-së, Donald Trump, ka bërë me dije se kompania Microsoft është në bisedime për të blerë aplikacionin TikTok. Kompania Microsoft ka refuzuar të komentojë më tepër lidhur me këtë deklaratë.
TikTok, i cili ka rreth 170 milionë përdorues amerikanë, u hoq përkohësisht nga përdorimi disa kohë para se ligji që kërkonte nga pronari i tij kinez, ByteDance, të shiste aplikacionin për arsye sigurie kombëtare ose të përballej me një ndalim, të hynte në fuqi më 19 janar.
Pas marrjes së detyrës më 20 janar, Trump nënshkroi një urdhër ekzekutiv që kërkonte të shtynte për 75 ditë zbatimin e ligjit.
Presidenti i SHBA-së ka thënë më parë se ishte i hapur për idenë që miliarderi Elon Musk të blinte aplikacionin e mediave sociale nëse CEO i Tesla (TSLA.O) dëshironte ta bënte këtë. Megjithatë, Musk nuk ka komentuar publikisht mbi ofertën e Trump.
Bisedimet e raportuara shënojnë herën e dytë që Microsoft është përmendur si një mundësi për të blerë TikTok. Gjatë mandatit të tij të parë, Trump urdhëroi TikTok të ndante versionin e tij amerikan nga ByteDance, duke cituar shqetësime për sigurinë kombëtare.
