Presidenti Trump do të vendosë 25% tarifa për importet e çelikut dhe aluminit

Presidenti i SHBA Donald Trump tha të dielën se do të shpallë tarifa të reja 25% për të gjitha importet e çelikut dhe aluminit në SHBA, një shtesë përtej taksave ekzistuese për metalet, në një tjetër përshkallëzim të politikës së tij tregtare.

Zoti Trump, duke folur para gazetarëve në avionin presidencial Air Force One, tha gjithashtu se do t’i shpallë tarifat reciproke të martën ose të mërkurën dhe se ato do të hyjnë në fuqi pothuajse menjëherë.

Gjatë mandatit të tij të parë, Presidenti Trump vendosi tarifa prej 25% për çelikun dhe 10% për aluminin, por më vonë i hoqi taksat për disa partnerë tregtarë, përfshirë Kanadanë, Meksikën dhe Brazilin.

Ish-presidenti Joe Biden më pas hoqi tarifat edhe për Britaninë, Japoninë dhe Bashkimin Evropian. Shfrytëzimi i kapaciteteve të çelikut në SHBA ka rënë në vitet e fundit.

Zëdhënësja e Shtëpisë së Bardhë Karoline Leavitt tha se tarifat e reja do të jenë një shtesë mbi detyrimet ekzistuese për çelikun dhe aluminin.

Zoti Trump njoftoi të premten se do të vendosë tarifa reciproke – duke rritur normat e tarifave të SHBA-së në përputhje me ato të partnerëve tregtarë – për shumë vende këtë javë.

Ai nuk identifikoi vendet, por tha se tarifat do të vendosen “në mënyrë që të trajtohemi në mënyrë të barabartë me vendet e tjera”./VOA