Presidentja Osmani: Epopeja e Dukagjinit, flakadan i lirisë!

Në përvjetorin e lavdishëm të Epopesë së Dukagjinit, presidentja e Kosovës, Vjosa Osmani, ka nderuar sakrificën e heronjve të Ushtrisë Çlirimtare të Kosovës (UÇK) dhe të familjes Haradinaj.

Me një postim në Facebook, ajo ka theksuar se Kosova e pavarur është ndërtuar mbi gjakun dhe sakrificat e atyre që luftuan për lirinë e vendit.

Postimi i plotë:

Në këtë përvjetor të lavdishëm, ishim në Gllogjan që të kujtojmë dhe nderojmë Epopenë e Dukagjinit, një nga momentet më të ndritura të luftës sonë për liri. Në themelet e Kosovës së pavarur qëndron sakrifica e heronjve të UÇK-së, e familjes Haradinaj dhe e të gjithë atyre që u ngritën kundër padrejtësisë, e për lirinë dhe shtetin tonë.
Me nderimin më të madh përkulemi para dëshmorëve Himë Haradinaj, Gazmend Mehmetaj dhe Agron Mehmetaj, që dhanë jetën në këtë datë, për të mos vdekur kurrë. Ata u bënë simbol i rezistencës, guximit dhe besimit në lirinë e Kosovës.
Në Kosovën e pavarur dhe sovrane, amaneti i heronjve na obligon ta ndërtojmë një shtet të fortë, dinjitoz, të përparuar e me aleanca të fuqishme. Liria është trashëgimia e tyre, e përgjegjësia jonë!
Lavdi dëshmorëve të kombit!
Nderim i përhershëm UÇK-së!