Mickoski: Është korrigjuar padrejtësia, janë ndarë mirënjohje kombëtare për arritjet më të larta në sport

Të nderuar fitues të mirënjohjeve,
Të nderuar përfaqësues të institucioneve sportive,
Të nderuar mysafirë, zonja dhe zotërinj,
Sot nuk flasim vetëm për sportin.
Flasim për sakrificën.
Flasim për këmbënguljen, për dinjitetin, për dashurinë ndaj atdheut.
Sot, këtu, po e korrigjojmë shtetin para ambasadorëve të tij më krenarë – sportistët që me vite e kanë mbajtur Maqedoninë në zemër dhe mbi kurriz, në terenet, arenat dhe podiumet anembanë botës.
Ndarja e mirënjohjeve kombëtare për arritjet më të larta në sport është më shumë se një formalitet.
Ajo është një akt respekti i thellë, i sinqertë dhe i merituar.
Njohje e një vepre jetësore.
Njerëzve që nuk kërkuan asgjë, por dhanë gjithçka.
Njerëzve që i shndërruan ëndrrat në rezultate dhe rezultatet në krenari kombëtare.
Me këtë vendim, shteti vendos një parim të ri – që suksesi i lartë sportiv duhet të vlerësohet jo vetëm në momente euforie, por edhe gjatë gjithë jetës.
Pikërisht për këtë këto mirënjohje janë të përjetshme.
Kjo është një shprehje konkrete respekti dhe falënderimi, dhe jo vetëm simbolikë.

Të dashur miq,
Nuk e bëjmë këtë nga mirësjellja, por nga bindja e fortë.

Nga bindja se një shtet që nuk i vlerëson heronjtë e tij, ngadalë e humb dhe shpirtin e tij.
Shteti nuk guxon dhe nuk do ta harrojë askënd që solli lavdi dhe nder, dhe e promovoi të njëjtën.
Këto 22 mirënjohje janë vetëm fillimi.
Fillimi i një politike të re, një sistemi të ri vlerash, në të cilin sporti nuk është vetëm një garë, por një model.
Për shkak se, nëse sporti na mëson diçka, është se asgjë nuk vjen brenda natës.
Se sukseset janë fryt i rrugëve të gjata dhe të vështira.
Dhe pikërisht për këtë arsye jemi këtu sot – për të korrigjuar shtetin para atyre që e kanë merituar prej kohësh këtë nder.
Në të njëjtën kohë, kjo mirënjohje nuk është vetëm një shpërblim për të kaluarën, por edhe një porosi për të ardhmen.
Për të gjithë talentët e rinj që sot ndodhen në një udhëkryq të jetës!
Të cilët pyesin veten nëse ia vlen të sakrifikohen, të japin gjithë kohën e tyre, energjinë dhe zemrën për sportin, si dhe për atdheun e tyre.
Me këtë çmim, ne u shtrijmë dorën dhe u themi: Maqedonia do të jetë këtu për ju.
Do t’ju njohë, do t’ju mbështesë dhe, brenda mundësive të saj, do t’ju shpërblejë – ashtu siç sot i shpërblejmë ata që tashmë e kanë shkruar emrin e tyre me shkronja të arta.

Të nderuar fitues,

Në emrin tuaj, janë intonuar himne, janë valëvitur flamuj, janë shkruar kujtime që do të zgjasin përgjithmonë.
Sot, përmes këtij eventi modest, përpiqemi që gjithëçka të kthejmë me dinjitet.
Me mirënjohje që do të mbetet – si një shenjë e përhershme për një kontribut të përhershëm.
Do të vazhdojmë të investojmë në sport, në kuadër të mundësive tona.
Të ndërtojmë kushte, por më e rëndësishmja – të ndërtojmë një sistem vlerësimi, ku suksesi nuk do të harrohet dhe përpjekja e investuar do të kthehet me respekt.
Në emrin tim dhe në emër të Qeverisë, ju përgëzoj.
Faleminderit.
Rroftë sporti dhe Zoti e bekoftë Maqedoninë.