Turqia në konferencën e OKB-së: Pushtimi i vazhdueshëm izraelit, pengesa kryesore për shtetin palestinez
Zëvendësministri i Jashtëm i Turqisë, Nuh Yılmaz, tha sot se pushtimi shumëdekadësh i Izraelit mbetet pengesa kryesore për shtetësinë palestineze, raporton Anadolu.
“Është një mendim i përsëritur se pushtimi i vazhdueshëm është pengesa kryesore në rrugën drejt shtetësisë palestineze”, tha Yılmaz në një konferencë të nivelit të lartë për zgjidhjen me dy shtete në selinë e OKB-së në New York.
Duke vlerësuar Francën për vendimin e saj të fundit për të njohur Shtetin e Palestinës, ai tha: “Shpresojmë sinqerisht që shumë të tjerë do të ndjekin këtë shembull së shpejti”.
Duke u ndalur në komentet e paraqitura nga grupet e punës, Yılmaz tha se grupi shprehu “një dëshirë të fortë … për të kontribuuar në përfundimin e vuajtjeve shumëdekadëshe të popullit palestinez”.
Ai theksoi se “pati propozime të drejta për zhvillimin e kapaciteteve të Autoritetit Palestinez, duke fuqizuar Shtetin e Palestinës”, dhe se “thirrjet për të adresuar çështjen urgjente të përfundimit të pushtimit izraelit” dominuan diskutimet.
Yılmaz paralajmëroi gjithashtu për planet izraelite të aneksimit, duke thënë: “Ndërsa aneksimi i territoreve palestineze nga Izraeli është afër, siç u kërkua nga parlamenti izraelit më 23 korrik, mjetet tona duhet të jenë proporcionalisht të fuqishme dhe efektive”.
Ndër propozimet e paraqitura nga delegacionet pjesëmarrëse, Yılmaz tha se “disa palë prezantuan sugjerime për krijimin e mekanizmave për të zbatuar të drejtën ndërkombëtare dhe të drejtën ndërkombëtare humanitare”.
Ai shtoi se, përtej krizës humanitare në përkeqësim në Rripin e Gazës, “vendbanimet ilegale, konfiskimi i tokave dhe prishja e shtëpive nga Izraeli në Bregun Perëndimor, përfshirë Kudsin Lindor, kërkojnë gjithashtu veprim të menjëhershëm”.
Duke theksuar se disa anëtarë të grupit të punës “theksojnë se duhet të vendosen masa, përfshirë sanksione, kundër kolonëve në territoret e pushtuara palestineze,” ai theksoi se “Izraeli gjithashtu mund të përballet me masa ndëshkuese, pasi është ai që e mundëson ndërtimin e vendbanimeve ilegale”.
“Veprimet e Izraelit për të zhvendosur, shpërngulur dhe dëbuar popullin palestinez nga atdheu i tyre duhet të ndalen pa vonesë. Nuk mund ta imagjinojmë një shtet palestinez pa një komb palestinez”, tha ai.
Yılmaz renditi tetë përparësitë kyçe të identifikuara nga grupi i punës: zbatimi i zgjidhjes me dy shtete, njohja dhe anëtarësimi i plotë i Palestinës në OKB, ndihma humanitare dhe rindërtimi në Gaza, zhvillimi institucional, ndalimi i vendbanimeve kolone dhe zhvendosjeve me forcë, llogaridhënia dhe sundimi i ligjit, përfshirja e shoqërisë civile dhe garancitë e sigurisë.
“Propozimet dërgojnë një mesazh të qartë: Bashkësia ndërkombëtare duhet të veprojë me urgjencë dhe vendosmëri për të ruajtur vizionin e zgjidhjes me dy shtete, për të mbrojtur parimet ligjore dhe humanitare dhe për të kaluar nga shprehjet e shqetësimit në aktivizimin e mekanizmave të llogaridhënies”, tha ai.
