30 shkolla të reja hapin dyert, Rama: Në 8 shtator, ambiente moderne për mijëra nxënës në fshat e qytet

Në fillim të vitit të ri shkollor, më 8 Shtator, do të hapin dyert 30 shkolla të rikonstruktuara nga veriu në jug të vendit, të cilat do të mirëpresin mbi 8 mijë nxënës dhe mësues.

Lajmin e bëri të ditur kryeministri Edi Rama përmes një postimi në rrjete sociale.

Kreu i qeverisë theksoi se investimet në arsim nuk do të ndalen.

“Vijojmë të investojmë për ndërtimin dhe rehabilitimin e objekteve arsimore, shkollave, palestrave e terreneve sportive, për të garantuar të njëjtin standard, kudo në Shqipëri”, shkruan Rama.

Ndërkohë në fshatin Bërzhitë të Tiranës, gjithashtu po ndërtohet shkolla e re “Mersin Duqi”, e cila pritet të jetë gati sa më shpejt për të mirëpritur nxënësit e zonës.

Nënkryetari i Bashkisë per territorin dhe zona rurale, Blendi Sulaj inspektoi punimet duke vënë në dukje se shkolla do shërbejë edhe si hapësirë rekreative për komunitetin pas orarit zyrtar të mësimit.

“Po bëhet një punë shumë e mirë. Bashkia e Tiranës do të jetë shumë e vëmendshme ndaj të gjitha investimeve që do të bëhen në zonat rurale sepse do t’i shërbejnë komunitetit, por mbi të gjitha kjo shkollë do t’i shërbejë mbi 180 nxënësve dhe shkolla do të shihet të paktën edhe pas orarit shkollor të jetë një pjesë, që e gjithë zona t’a shfrytëzojë për ambientet rekreative që do të krijohen dhe që është bërë e mundur”, tha Blendi Sulaj.

Inspektime janë zhvilluar edhe në shkollën “Selman Meta”, ku Bashkia premton të të përballojë çdo nevojë që do të kenë objektet arsimore të këtyre zonave.