VLEN dhe Lëvizja Arbëria bëhen bashkë për zgjedhjet lokale të tetorit
VLEN dhe Lëvizja Arbëria kanë nënshkruar marrëveshje bashkëpunimi për zgjedhjet e 19 tetorit. Nga VLEN thonë se ky hap shihet si garanci për fitore dhe ndryshim politik, “me synim çlirimin e komunave nga korrupsioni dhe ndikimi i BDI-së”.
“Sot u nënshkrua marrëveshja e bashkëpunimit mes VLEN dhe Lëvizjes Arbëria, të udhëhequr nga ish-deputetët Bekim Fazliu, Merale Ferati, Orhan Ibrahimi dhe personalitete të tjera me peshë në skenën politike. Ky akt është një dëshmi e qartë se jehona e fitores së madhe të 19 tetorit po rritet çdo ditë dhe po mbisundon në çdo cep të vendit. Kjo marrëveshje është vulosja e sigurt e ndryshimit, fitorja e qytetarëve mbi padrejtësitë, dhe garanca se krimi dhe korrupsioni do të asgjësohen njëherë e përgjithmonë. Komunat tona nuk do të jenë më pronë e BDI-së së kapur nga korrupsioni dhe “non gratat”. Nga 19 tetori ato do të çlirohen dhe do t’u kthehen qytetarëve me një pushtet vendor të ndershëm, transparent dhe të përkushtuar për zhvillim”, thuhet në njoftimin e VLEN-it.
Bekim Fazliu, nga Lëvizja Arbëria tha se marrëveshjen për bashkëpunim me VLEN-in për zgjedhjet lokale, së bashku me mbështetësit e kanë parë si një domosdoshmëri të kohës. Ai nënvizoi se ky bashkëpunim ndërton një kulturë të re dhe larg hijeve të korrupsionit moral.
“Sidomos përfaqësuesit ndërkombëtarë të Aleatëve tanë që janë këtu në Maqedoni, me deklaratat e tyre për korrupsionin që ka hy në çdo pore dhe segment këtu në Maqedoni nga Qeveria e kaluar, dhe futja në listë te zezë të atyre që kanë qenë përgjegjës, na u bë e qartë se cilën rrugë duhet ta ndjekim”, u shpreh Bekim Fazliu, Lëvizja Arbëria.
