Këshilli i Sigurimit i OKB-së e miraton rezolutën e ShBA-së për planin e Trumpit rreth Gazës
Këshilli i Sigurimit i Kombeve të Bashkuara të hënën miratoi një rezolutë të hartuar nga Shtetet e Bashkuara që i jep mbështetje planit të presidentit amerikan, Donald Trump, për t’i dhënë fund luftës në Gaza dhe që autorizon një forcë ndërkombëtare të stabilizimit për enklavën palestineze.
Plani 20-pikësh i Trumpit për Gazën është i përfshirë si shtojcë në këtë rezolutë, raporton agjencia e lajmeve “Reuters”.
Rusia, e cila e ka të drejtën e vetos në Këshillin e Sigurimit, më herët kishte sinjalizuar kundërshtim të mundshëm ndaj rezolutës, por gjatë votimit abstenoi, duke e mundësuar miratimin e saj.
Autoriteti Palestinez të premten lëshoi një deklaratë me të cilën e mbështeti rezolutën e hartuar nga Uashingtoni, transmeton gazeta “Nacionale”.
Rezoluta ka nxitur kundërthënie në Izrael, sepse dokumenti i referohet një mundësie për shtetësi për palestinezët në të ardhmen.
Në tekstin e rezolutës thuhet se “mund të krijohen përfundimisht kushtet për një shteg të besueshëm drejt vetëvendosjes dhe shtetësisë palestineze” porsa Autoriteti Palestinez të ketë kryer një program reformash dhe rizhvillimi i Gazës të ketë avancuar.
Kryeministri izraelit, Benjamin Netanyahu, nën trysni nga partnerët djathtistë të koalicionit qeveritar, tha të dielën se vendi i tij vazhdon të jetë kundër një shteti palestinez dhe u zotua për demilitarizimin e Gazës “me mënyrën e lehtë apo me mënyrën e vështirë”.
