Kurti për Deharin: Punën e drejtësisë s’mund ta bëjmë, 9 vjet janë tepër shumë pa të vërtetën

Në nëntëvjetorin e vdekjes së aktivistit të Lëvizjes Vetëvendosje, Astrit Dehari, kryeministri në detyrë Albin Kurti ka kërkuar zbardhjen e plotë të rastit, duke theksuar se pritja e gjatë për drejtësi është e papranueshme. Ai ka potencuar se s’mund ta bëjnë punën e drejtësisë, por bëri thirrje për angazhim më të madh për ta zbuluar të vërtetën.

Në homazhet e mbajtura të mërkurën në Prizren, Kurti ishte i shoqëruar nga kryetari i Kuvendit, Dimal Basha, nënkryetarja Albulena Haxhiu, ministra në detyrë, deputetë dhe aktivistë të Vetëvendosjes, të cilët më herët vizituan edhe familjen Dehari.

“Edhe njëherë i bëjmë thirrje sistemit të drejtësisë që të bëjë shumë më tepër dhe të angazhohet siç nuk është angazhuar deri më tash, sepse kjo padrejtësi, ky krim është plagë e hapur jo vetëm për familjen Dehari e Vetëvendosjen, por për mbarë familjen tonë shoqërore. Në punën e Prokurorisë dhe të sistemit të drejtësisë nuk mund të ndërhyjmë, janë shtylla të ndara të pushtetit. Ne shprehim gatishmërinë, vullnetin dhe interesin tonë për drejtësi. Ka shumë mundësi që në këtë rast duhet të hetohet edhe procesi i hetimit që është zhvilluar në fillimet e tij, meqë nëse diçka nis mbrapsht, atëherë bëhet dyfish më e vështirë që të mbarojë mbarë. Si kryeministër, aktivistët tanë, ministrat, deputetët tanë nuk mund të bëhen prokurorë e gjyqtarë”, deklaroi Kurti.

Kryeministri në detyrë u shpreh se Dehari ishte i burgosur për arsye politike, pasi “nuk pajtohej me pushtetin e atëhershëm”, ndërsa theksoi se mungesa e drejtësisë për këtë rast është tregues i një sistemi të dështuar hetimor.

“Si qeveri jemi shumë të gatshëm dhe të interesuar ta ndihmojmë prokurorinë e shtetit për të vërtetën. Mirëpo nëntë vjet janë tepër shumë – madje edhe nëntë muaj do të ishin shumë pa u zbardhur ky rast, pa u sqaruar e vërteta dhe pa u sjellë drejtësia”, ka thënë Kurti.

Astrit Dehari ishte aktivist i Lëvizjes Vetëvendosje dhe student i mjekësisë në Universitetin e Prishtinës. Ai u arrestua në gusht të vitit 2016, së bashku me disa aktivistë të tjerë të VV-së, nën dyshimet për sulmin me mjet shpërthyes ndaj ndërtesës së Kuvendit të Kosovës.

Më 5 nëntor 2016, Dehari u gjet i vdekur në qelinë e tij në burgun e Prizrenit, ku po mbahej në paraburgim prej 68 ditësh.

Autoritetet fillimisht e cilësuan vdekjen si vetëvrasje, por familja ka këmbëngulur vazhdimisht se bëhet fjalë për vrasje.

Postimi nga KURTI:

Menjëherë pasi që kishte vënë lule të freskëta te varri i Astrit Deharit, më 5 nëntor 2020, Rexhep Selimin e dërguan në burgun e Hagës ku ende po e mbajnë.
Përveç tij, edhe Hashim Thaçi, Kadri Veseli dhe Jakup Krasniqi po ndodhen në paraburgim tash e pesë vjet. Pesë vite pritje, pesë vite pas hekurave ndërkohë që arsyeja e njëjtë përsëritet në çdo vendim për refuzimin e lirimit: “rreziku i ndikimit mbi dëshmitarët”.
Por Prokuroria e ka përfunduar rastin e saj. Dëshmitarë më nuk ka. Nuk ka as arsye ligjore, as morale që të mbahen edhe më tej në paraburgim.
Kështu kam menduar që nga dita e parë. Kemi punuar gjatë dhe me përkushtim për këtë çështje, në heshtje, sepse shpesh puna e mirë bëhet pa zhurmë. Por ndonjëherë puna që nuk shihet, nuk dihet.
Si Kryetar i Lëvizjes VETËVENDOSJE! e si deputet prej vitit 2014 bashkë me Rexhën i patëm paraqitur të gjitha argumentet e qëndrimet për këtë Gjykatë që është sot duke gjykuar.
E si Kryeministër, zyra ime dhe unë kemi kërkuar lirimin e tyre që nga fillimi. Në vijim po bashkëngjes letrën që i është dërguar drejtpërdrejt znj. Trandafilova në lidhje me këtë çështje në shtator të vitit 2022. E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre, dhe ta mbrojnë në liri luftën e drejtë çlirimtare të Kosovës. Përgjigja e znj. Trandafilova pas dy javësh që mori letrën nga unë nuk ndryshoi gjë. Kërkesat e paraqitura nuk morën zgjidhje.
Kërkesat tona qëndrojnë akoma, e në Kosovë ekzistojnë të gjitha garancitë për përgjigje pozitive ndaj tyre.

9 vjet pa Astritin, 9 vjet pa drejtësi për Astrit Deharin
Sot, në 9 vjetorin e vrasjes së Astrit Deharit, Kryeministri i Republikës së Kosovës, Albin Kurti, bashkë me Kryetarin e Kuvendit Dimal Basha, Nënkryetaren e Kuvendit, Albulena Haxhiu, kryetarët tanë dhe kandidatët tanë për kryetarë të komunave, me anëtarë të kryesisë së Lëvizjes, ministra, deputetë e aktivistë, vizituan familjen Dehari dhe më pas, së bashku me ta dhe me shumë qytetarë e miq, bënë homazhe dhe vendosën lule të freskëta te varri i Astrit Deharit.
Sot kujtojmë me mall e dhembje, por edhe me vendosmëri për të mos harruar e për të mos u pajtuar me padrejtësinë. Kanë kaluar nëntë vjet që prej ditës kur Astriti u vra në burgun e Prizrenit, ku mbahej në paraburgim pa aktakuzë, pa gjykim, pa dënim e pa u marrë në pyetje për 68 ditë.
Astriti ishte shembulli i aktivistit që angazhohej me përkushtim për të varfërit, për punëtorët, për të përjashtuarit e shoqërisë. Si student, aktivist dhe doktor i ri, ai e shihte profesionin edhe si mjet për t’u afruar me njerëzit. Ishte njeri i guximit, i idealit dhe i dashurisë për lirinë e për drejtësinë sociale.
Kryeministri Albin Kurti, në prononcimin e tij për media, tha se Astrit Dehari ishte në burg për shkaqe politike për shkak se nuk pajtohej me pushtetin e atëhershëm. Ai u mbyt në burg dhe sot e kësaj dite nuk ka as të akuzuar, as të gjykuar e lëre më të dënuar për rastin e tij.
“Si qeveri e Republikës së Kosovës jemi në gjendje gatishmërie shumë të vullnetshëm dhe shumë të interesuar që ta ndihmojmë prokurorinë e shtetit, mirëpo 9 vjet janë tepër shumë, edhe 9 muaj do të ishin shumë pa u zbardhur ky rast, pa u sqaruar e vërteta dhe pa u sjellur drejtësia”, shtoi kryeministri Kurti.
Lavdi!