Shqipëria kremton 81-vjetorin e çlirimit
Krerët më të lartë të shtetit festuan 81-vjetorin e çlirimit të Shqipërisë, një ditë e shënuar kombëtare që nderon sakrificën, qëndresën dhe heroizmin e mijëra të rinjve e të rejave që dhanë jetën për lirinë e vendit.
Presidenti Bajram Begaj, kryeministri Edi Rama, kryetari i Kuvendit Niko Peleshi, ministri i Mbrojtjes Pirro Vëngu, kryetarja e komanduar e Tiranës, Anuela Ristani si dhe veteranë nderuan dëshmorët, ndërsa vendosën kurora me lule në Memorialin “Nëna Shqipëri”.
Edhe këtë 29 nëntor politika festoi e ndarë.
Debati për datën e çlirimit vazhdon ende, të majtët e kujtojnë çlirimin e vendit në 29 nëntor, ndërsa demokratët festën e çlirimit e festojnë në datën 28 së bashku me atë të pavarësisë.
Nëna Shqipëri – LAVDI DËSHMORËVE TË ATDHEUT
Postimi nga Bajram Begaj:
Gëzuar festën e Çlirimit, Shqipëri!
Dje, sot dhe përgjithmonë besnikë ndaj të njëjtave vlera.
Sot përkulemi me nderim para sakrificës së popullit tonë dhe dëshmorëve të Luftës së Dytë Botërore, që dhanë jetën për lirinë dhe çlirimin e atdheut.
Guximi, qëndresa dhe gjaku i tyre janë themelet mbi të cilat qëndron liria jonë.
Mirënjohja jonë nuk është vetëm kujtesë historike, por detyrim i përditshëm për të mbrojtur lirinë, dinjitetin njerëzor dhe paqen.
