KE propozon paketën e ndihmës prej 90 mld euro për Ukrainën
Komisioni Evropian prezantoi propozimet legjislative për të ofruar 90 miliardë euro mbështetje financiare për Ukrainën për vitet 2026 dhe 2027.
Kjo masë përforcon angazhimin e BE-së ndaj Kievit në mes të luftës së vazhdueshme me Rusinë.
Propozimi synon të ndryshojë mekanizmin për ndihmë buxhetore dhe rregulloren e kornizës financiare shumëvjeçare, duke lejuar që huaja të mbulohet nga buxheti i BE-së.
Huaja do të ndahet në dy pjesë kryesore: 60 miliardë euro për ndihmë ushtarake, 30 miliardë euro për mbështetje të përgjithshme buxhetore.
Komisioni theksoi se BE-ja rezervon të drejtën të përdorë asetet e ngrira ruse për të shlyer huatë, në përputhje me ligjin evropian dhe ndërkombëtar.
Financimi do të bëhet përmes huamarrjes së përbashkët nga tregjet e kapitalit, e garantuar nga buxheti i BE-së, si në programet e mëparshme të ndihmës.
Presidentja e Komisionit Evropian, Ursula von der Leyen, gjatë konferencës për shtyp në Bruksel, tha se 24 nga 27 shtetet anëtare marrin pjesë në paketë.
Fondet synojnë të forcojnë kapacitetet mbrojtëse të Ukrainës dhe të mbajnë funksionet shtetërore e shërbimet publike.
“Ato do të përdoren për blerjen e pajisjeve, kryesisht nga Ukraina, nga Bashkimi Evropian dhe vendet EEA/EFTA. Por nëse këto blerje nuk janë të mundshme në këtë rajon ose në kohë të duhur, atëherë mund të jetë e mundur të blihen pajisje edhe jashtë Bashkimit Evropian”, theksoi ajo.
Propozimet janë dërguar në Parlamentin Evropian dhe Këshillin e BE-së për shqyrtim dhe miratim.
Komisioni theksoi nevojën për miratim të shpejtë që disbursimet të fillojnë në tremujorin e dytë të 2026-s, me pritshmëri për pagesën e parë në prill.
Pasi të miratohen, Komisioni do të finalizojë marrëveshjet zbatuese me autoritetet ukrainase dhe do të lëshojë këstin e parë.
Mbështetja do të shoqërohet me kushte, përfshirë reforma për forcimin e sundimit të ligjit dhe luftën kundër korrupsionit, sipas Planit të Ukrainës.
Që nga fillimi i luftës ruse kundër Ukrainës, BE-ja dhe shtetet anëtare kanë ofruar 193.3 miliardë euro mbështetje, duke përfshirë 3.7 miliardë euro nga asetet e ngrira ruse.
