Begaj: Askush s’mund t’i vërë në pikëpyetje sovranitetin dhe integritetin e Kosovës
Presidenti i Shqipërisë, Bajram Begaj, duke komentuar situatën e tensionuar në veri të Kosovës, ka thënë se askush s’mund t’i vërë në pikëpyetje sovranitetin dhe integritetin e Kosovës dhe të drejtën e saj për të ndërtuar e konsoliduar institucionet.
Në një reagim në Facebook të hënën në mbrëmje, Begaj e ka quajtur të papranueshme dhunën ndaj KFOR-it nga serbët.
“Dënoj ashpër keqpërdorimin e popullsisë serbe të veriut të Kosovës dhe dhunën e papranueshme ndaj trupave paqeruajtëse të KFOR-it në Kosovë. Asnjë pretekst nuk mund të përdoret për të penguar zbatimin e plotë të marrëveshjes së Brukselit dhe Ohrit, që tregon rrugën e duhur të zgjidhjes së problemeve të hapura dhe të normalizimit të marrëdhënieve midis Kosovës dhe Serbisë. Askush nuk mund të vërë në pikëpyetje sovranitetin dhe integritetin e Republikës së Kosovës, si dhe të drejtën e saj për të ndërtuar e konsoliduar institucionet demokratike dhe multietnike”, ka shkruar ai.
Begaj po ashtu i ka bërë thirrje autoriteteve të Kosovës për më shumë durim dhe koordinim me partnerët.
“Por gjithashtu, i përsëris publikisht thirrjen time vëllazërore autoriteteve kosovare për më shumë durim e maturi dhe sidomos koordinim të ngushtë me partnerët tanë”, ka shkruar ai.
Që nga e premtja, në veri serbët po protestojnë kundër hyrjes së kryetarëve të rinj të komunave në objektet komunale. Fillimisht Policia e Kosovës mundësoi hyrjen e kryetarëve në objekte, ndërsa të hënën – në ditën e dytë të tensioneve – ndërhyri KFOR-i. Në mbrëmje, KFOR-i njoftoi për të paktën 25 ushtarë të plagosur në Zveçan nga protestuesit e dhunshëm.
Kryetarët e rinj, Izmir Zeqiri i Zubin-Potokut, Ilir Peci i Zveçanit dhe Lulzim Hetemi i Leposaviqit bënë betimin në pozitat e tyre më 25 maj. Ndërsa kryetari i Mitrovicës së Veriut, Erden Atiq, u betua më 19 maj. Ata fituan në zgjedhjet e jashtëzakonshme të prillit, e të cilat u bojkotuan nga shumica e serbëve. Zgjedhjet u kontestuan edhe nga pushteti i Serbisë, e cila ka inkurajuar serbët lokalë që të mos njohin drejtuesit e rinj të komunave.
