BE-ja synon të blejë armë për Ukrainën me të ardhurat e siguruara nga asetet e ngrira të Rusisë

Presidentja e Komisionit të Bashkimit Evropian (BE) Ursula von der Leyen propozoi blerjen e pajisjeve ushtarake për Ukrainën me të ardhurat nga asetet dhe rezervat ruse të ngrira në kuadër të sanksioneve kundër Moskës, raporton Anadolu.

Duke folur për forcimin e mbrojtjes evropiane në seancën e Asamblesë së Përgjithshme të Parlamentit Evropian (PE) të mbajtur në Strasburg, von der Leyen rikujtoi se Lufta Rusi-Ukrainë ka hyrë në vitin e tretë dhe tha se Koreja e Veriut i siguron Rusisë municion dhe Irani mjete ajrore pa pilot.

“Lufta e vazhdueshme në Gaza dhe paqëndrueshmëria e përhapur në Lindjen e Mesme tregojnë për një periudhë pasigurie dhe konflikti në rajon dhe më gjerë”, tha shefja e Komisionit.

“Ne duhet të fillojmë të punojmë për të ardhmen e arkitekturës evropiane të sigurisë”, theksoi ajo, duke shtuar se vendet anëtare kanë rritur shpenzimet e tyre të mbrojtjes, derisa buxhetet e mbrojtjes kombëtare janë rritur me 20 për qind krahasuar me një vit më parë.

Von der Leyen theksoi se kanë ndërmarrë hapa shumë të rëndësishëm në rritjen e industrisë së mbrojtjes dhe kapaciteteve prodhuese dhe deklaroi se do të dyfishojnë prodhimin e municioneve në Evropë deri në fund të vitit 2025 dhe do të prodhojnë më shumë se 2 milionë predha artilerie në vit.

“Ka ende shumë për të bërë dhe ne duhet të lëvizim shpejt”, deklaroi von der Leyen, duke thënë se vendet anëtare duhet të ristrukturojnë, rinovojnë dhe modernizojnë urgjentisht forcat e tyre të armatosura.

Von der Leyen theksoi se Evropa duhet të ndajë më shumë burime për mbrojtjen dhe paralajmëroi se do të paraqesin propozimet e tyre për Strategjinë e parë Evropiane Industriale të Mbrojtjes në javët e ardhshme.

Duke deklaruar se një nga objektivat kryesore të strategjisë dhe Programit të Investimeve të Mbrojtjes të përgatitur së bashku është t’i jepet përparësi blerjeve të përbashkëta të mbrojtjes, von der Leyen tha se mund të bëjnë porosi së bashku në industrinë e mbrojtjes nëpërmjet marrëveshjeve të parablerjes.

“Industria evropiane e mbrojtjes ka nevojë për akses në kapital”, tha von der Leyen, duke u bërë thirrje sektorëve publikë dhe privatë të mbështesin industrinë e mbrojtjes.

Presidentja e Komisionit Evropian theksoi se mbështet idenë e një anëtarësie përgjegjëse për fushën e mbrojtjes në komisionin e ri që do të përcaktohet pas zgjedhjeve të BE-së.

– Asetet ruse

“Është koha për të filluar diskutimin e çështjes së përdorimit të fitimeve të papritura nga asetet e ngrira ruse për të blerë së bashku pajisje ushtarake për Ukrainën”, tha Von der Leyen, duke shtuar se përdorimi i këtyre parave do të ishte një simbol i fuqishëm dhe do t’i bënte Evropën dhe Ukrainën më të sigurta.

Ndryshe, vendet e BE-së kanë ngrirë rreth 200 miliardë euro të Bankës Qendrore Ruse për shkak të luftës në Ukrainë. Institucionet financiare që mbajnë asete ruse bëjnë një fitim të konsiderueshëm duke i riinvestuar ato ndërsa maturohen.

BE-ja synon të ardhurat nga këto asete dhe jo paratë kryesore.