Maqedoni, rimëkëmbja ekonomike pritet të jetë një nga sfida kryesore të qeverisë së re
Qeverinë e re e pret sfida e ringjalljes së ekonomisë, e për këtë Lidhja e Sindikatave vetëm se ka vënë kushtet e saj. Në 100 ditët e para të ekzekutivit, sindikalistët thonë se kanë vënë vijat e kuqe për rritje të pagës minimale në 450 euro në nivel vendi dhe të rimbursimit të kostove të transportit dhe ushqimit. Nga LSM thonë se kanë ardhur sinjalet e para nga kandidati për mandatar, por presin që me formimin e Qeverisë të ulen në bisedime me ta së bashku edhe me komunitetin e punëdhënësve.
“Ata pyesin veten pse ne kërkojmë rimbursimin e kostove të transportit për në dhe nga vendi i punës. Deputetët ngarkuan buxhetin 1,124,915 € për shpenzimet e udhëtimit nga gushti 2020 deri në dhjetor 2023, ose 426,360 € për shpenzimet e udhëtimit në 2022, dhe 366,740 € në 2023. Punëtorët shpenzojnë deri në 20% të pagës së tyre për të shkuar në vendin e tyre të punës dhe për t’u kthyer në shtëpi”, thonë nga Lidhja e Sindikatave të Maqedonisë.
Lupço Radovski, tha se pagesa shtesë për udhëtimin nga shtëpia në punë dhe anasjelltas por edhe pagesa e shujtës ditore në sektorin publik ashtu edhe privat, duhet tu jepet shtesë punëtorëve, por mos tu përfshihet në pagën bazë ngaqë do tu rritet tatimet personale dhe kontributet.
“Gjithashtu apelojmë se mos të rritet vetëm paga minimale 450 euro, por të ketë rritje të përshkallëzuar në të gjitha firmat në sektorin privat dhe në institucionet publike sipas kompleksiteti në vendin e punës. Kështu mund të arrijmë suksesin që ti mbajmë rinin tonë këtu, të cilët do të kishin një prosperitet për të krijuar familje dhe të mos punojnë për ekonomi të tjera jashtë shtetit”, tha Lupço Radovski, Kryetar i Sindikatës së tekstilit.
22.567 denarë është paga minimale, ndërsa 22.200 denarë ose 36,9% nga shporta minimale sindikale shpenzohen për ushqim dhe pije për mbijetesën e një familje katër anëtarësh. Ata thonë se punëtorët kanë nevojë për tu kompensuar shpenzime e ushqimit në vendet e tyre të punës në masën 20% të pagës mesatare, pasi disa prej tyre nuk kanë as për gjevrek e jogurt./Alsat.mk
