Guterres bën thirrje për ndaljen e luftimeve në Siri: Mijëra civilë janë në rrezik

Sekretari i Përgjithshëm i Kombeve të Bashkuara, Antonio Guterres, tha se ka nevojë për qasje të menjëhershme humanitare për të gjithë civilët që kanë nevojë për ndihmë në Siri dhe kthimin e procesit politik, të ndërmjetësuar nga OKB-ja, për t’i dhënë fund gjakderdhjes.

Që nga fundi i nëntorit, rebelët e udhëhequr nga islamistët, kanë nisur një ofensivë ndaj forcave të presidentit Bashar al-Assad, i cili mbështetet nga Rusia dhe Irani.

Rebelët, e udhëhequr nga grupi islamist, Hayat Tahrir al-Sham (HTS), kanë bërë përparime të mëdha në ditët e fundit, përfshirë edhe marrjen e Alepos, qytetit më të madh në Siri.

Më 5 dhjetor ata hynë edhe në Hama, qytetin e katërt më të madh të Sirisë, teksa forcat qeveritare thanë se u tërhoqën nga qyteti “për të mbrojtur jetën e civilëve dhe për të parandaluar luftimet në qytet”.

Guterres u bëri thirrje “të gjithë atyre që kanë ndikim të bëjnë punën e tyre” për të ndalur vuajtjen e popullit në Siri, duke shtuar se të gjitha palët e përfshira në konflikt, janë të obliguar që të mbrojnë civilët.

“Dhjetëra mijëra civilë janë në rrezik në rajonin që veçse është përfshirë nga lufta”, u tha Guterres gazetarëve.

Përveç marrjes së kontrollit të Alepos, dhe hyrjes në Hama, rebelët po ashtu kanë marrë nën kontroll 14 fshatra dhe qyteza dhe i janë afruar deri në 35 kilometra Bazës Ajrore Khmeimim, që operohet nga rusët.

Siria ia dha këtë bazë ajrore Rusisë më 2015, pasi Moska e ndihmoi Damaskun që ta kthejë rrjedhën e luftës civile në favor të tij.

Përveç HTS-së – që është organizatë e shpallur terroriste nga Shtetet e Bashkuara – rebelët përbëhen edhe nga një grup ombrellë i milicive siriane që mbështeten nga Turqia, që njihet me emrin Ushtria Kombëtare Siriane.

Kombet e Bashkuara kanë thënë më herët se dhjetëra mijëra civilë janë zhvendosur si pasojë e luftimeve./REL