Mickoski: Qeveria nuk është kundër rritjes së pagës minimale, por ajo duhet të jetë rezultat i një marrëveshjeje të ndërsjellë midis punëtorëve dhe punëdhënësve

“Seanca e sotme e Këshillit Ekonomiko-Social konfirmon përcaktimin tonë të përbashkët – që çështjet kyçe ekonomike dhe sociale t’i zgjidhim përmes dialogut, partneritetit dhe përgjegjësisë së ndërsjellë. Ky Këshill nuk është një formalitet, por themeli i kohezionit social dhe stabilitetit në shtet; një vend ku interesat e punëtorëve, punëdhënësve dhe Qeverisë bashkohen me qëllim të ndërtimit të një ekonomie të qëndrueshme dhe të drejtë,” u shpreh Hristijan Mickoski, kryetar i Qeverisë së Republikës së Maqedonisë së Veriut.

Mickoski theksoi se qëllimi i Qeverisë është të krijojë një ekonomi më të fortë, e cila hap vende të reja pune dhe siguron një standard jetese dinjitoz për çdo qytetar.
“Qëllimi ynë është i qartë – një ekonomi më e fortë që krijon vlerë, hap vende të reja pune dhe siguron një standard jetese dinjitoz për çdo qytetar. Rritja ekonomike që po ndërtojmë duhet të jetë gjithëpërfshirëse dhe e drejtë, ndërsa rezultatet e kësaj rritjeje duhet të ndihen te punëtorët, por edhe të sigurojnë stabilitet dhe konkurrueshmëri për kompanitë. Në këtë kontekst, çështja e pagës minimale është jashtëzakonisht e rëndësishme dhe e ndjeshme,” tha ai.

Kryeministri Mickoski potencoi se Qeveria nuk është kundër rritjes së pagës minimale, por rritja duhet të jetë rezultat i marrëveshjes së ndërsjellë mes punëtorëve dhe punëdhënësve.

“Dëshiroj të theksoj qartë: Qeveria nuk është kundër rritjes së pagës minimale. Angazhimi ynë është që pagat të rriten dhe puna të vlerësohet në mënyrë të duhur. Por, gjithashtu jemi bindur fort se një rritje e tillë duhet të jetë rezultat i marrëveshjes së ndërsjellë mes punëtorëve dhe punëdhënësve, i arritur përmes dialogut social dhe mbi bazën e mundësive reale ekonomike. Dhe kjo rritje duhet të jetë në përputhje me potencialet dhe kapacitetet e ekonomisë. Unë nuk jam për zgjidhje të imponuara. Viti i ardhshëm do të jetë vit i luftës për një standard më të mirë jetese,” nënvizoi Mickoski dhe shtoi:

“Rritja e qëndrueshme e pagave nuk arrihet me vendime administrative të miratuara brenda natës, por me një ekonomi të fortë dhe produktive. Prandaj, paralelisht me bisedimet për pagën minimale, duhet të punojmë në rritjen e produktivitetit, mbështetjen e bizneseve, investimet në teknologji, inovacione dhe kapital njerëzor. Vetëm kështu do të krijojmë kushte që pagat të rriten në mënyrë të vazhdueshme, pa rrezikuar vendet e punës apo konkurrueshmërinë e kompanive.”

Kryeministri Mickoski vuri në dukje se Qeveria do të vazhdojë të jetë një partner aktiv dhe i përgjegjshëm në këtë proces.

“Qeveria do të vazhdojë të jetë një partner aktiv dhe i përgjegjshëm në këtë proces. Do t’i mbështesim të gjitha zgjidhjet që janë të drejta, ekonomikisht të qëndrueshme dhe të dakordësuar me konsensus. Interesi ynë nuk është pikësimi i shkurtër politik, por stabiliteti afatgjatë, parashikueshmëria dhe një ekonomi që mund t’u bëjë ballë sfidave të kohës moderne. Besoj se përmes dialogut të sinqertë, respektit të ndërsjellë dhe vizionit të përbashkët, mund të arrijmë në zgjidhje që do të sigurojnë standard më të mirë për punëtorët dhe një klimë të shëndoshë biznesi për punëdhënësit. Kjo është rruga drejt një ekonomie më të fortë dhe një të ardhmeje më të sigurt për shtetin tonë,” përfundoi Mickoski.