Trump: Irani kërkon marrëveshje me SHBA-në, por sulmet politike po pengojnë negociatat
Presidenti i Shteteve të Bashkuara, Donald Trump, ka reaguar sërish përmes një postimi në rrjetin e tij social Truth Social, duke deklaruar se Irani është i interesuar për arritjen e një marrëveshjeje me SHBA-në.
Sipas Trump, një marrëveshje e tillë do të ishte në interes të të dyja palëve, por ai akuzoi kundërshtarët politikë brenda vendit se po e bëjnë më të vështirë procesin e negociatave.
“Irani dëshiron vërtet të arrijë një marrëveshje dhe ajo do të jetë e mirë si për SHBA-në ashtu edhe për aleatët tanë”, shkroi presidenti amerikan. Ai shtoi se kritikat dhe sulmet politike nga demokratë dhe disa republikanë po ndikojnë negativisht në përpjekjet e tij diplomatike.
Trump ironizoi edhe komentet e shumta mbi mënyrën se si duhet të veprojë administrata e tij ndaj Iranit, duke thënë se disa kërkojnë veprime më të shpejta, të tjerë më të ngadalta, ndërsa ka edhe zëra që kërkojnë luftë ose shmangien e saj.
“Thjesht rrini të qetë dhe relaksohuni, në fund gjithçka do të shkojë mirë”, përfundoi ai.
Deklarata vjen në një moment tensionesh të reja mes Uashingtonit dhe Teheranit. Gjatë fundjavës, të dyja palët raportuan sulme ndaj objektivave ushtarake pranë Ngushticës së Hormuzit.
