Jo vetëm në Prishtinë, edhe në këtë qytet protestohet kundër dhunës ndaj femrave
Edhe në qytetin e Ferizajt është mbajtur një protestë ku është dënuar dhuna ndaj grave.
Me pankarta si “Gruaja nuk është prona jote”, “Edhe sa thirrje të humbura”, “Mos hesht, nesër mund të jesh ti”, etj, protestuesit janë mbledhur para Kuvendit komunal ku kanë kërkuar përgjegjësi nga institucionet e sigurisë dhe ato të drejtësisë.
Në emër të Këshillit Organizativ të protestës Dashurie Sefa, ka shprehu indinjatën ndaj siç tha ajo shpërfilljes institucionale kur vjen puna te trajtimi i dhunës në familje.
Sefa tha se patriarkati dhe Kanuni po vazhdojnë të sfidojnë ligjet dhe për pasojë dhuna ka shtrirje të frikshme nëpër familjet e Kosovës. Sipas saj barazia gjinore nuk vjen vetëm me protesta, sidomos në kushtet e një padrejtësie sociale brenda familjes dhe në nivel vendi.
Duke përmendur disa statistika, aktivistja Sefa potencoi se dhuna ndaj grave ka shënuar rritje nga viti në vit. Ajo tha se ka ardhur koha që gratë të mos i lënë pa prona dhe të ketë barazi gjinore
“Boll ma gratë i latë pa prona për t’i konsideruar ato pronë. Duam që peshorja për matjen e vlerave njerëzore të jetë e mbështetur në parimin e barazisë midis gjinive. Ndaj, nuk kërkojmë mëshirë ndaj institucioneve tona, por trajtim dinjitoz dhe profesional e prioritete të lartë rasteve të dhunës në familje. Dhuna në familje nuk është çështje private ”, tha Sefa.
Sipas statistikave policore dhuna në familje rritet nga viti në vit. Sipas tyre, gjatë vitit 2015 janë evidentuar 1038 raste, më 2016, 1227 raste, 1269 raste në vitin 2017, ndërsa në periudhën janar-qershor 2018, 628 raste. Rastet që nuk raportohen sipas Sefës janë shumëfish më të mëdha.
Psikologia Gyltene Dërguti, tha se këto protesta drejtohen edhe kundër personelit kompetent të Policisë që i shpërfilli thirrjet e grave.
“Nuk ka qenë traditë e shqiptarit të vras gra e fëmijë, as në kohë konfliktesh as në kohë. Burri që është burrë e trajton gruan si zonja e parë e shtëpisë, si zonja e parë vendit”, është shprehur Dërguti.
Aktivistja për të drejtat e njeriut, Luljeta Aliu, vuri theksin te dhuna institucionale. Ajo tha se më shumë se për dhunën ndaj grave duhet të flitet për të drejtat e njeriut. Ajo tha se nëpër institucione diskriminohen sepse ligjet janë vetëm për sy e faqe.
“Nuk e kemi më komoditetin me ndejt qetë, nuk e kemi komoditetin me pas frikë. Jemi tuj hupë shumë. Me tema të mëdha po e mbajnë veten në pushtet, po i mbajnë institucionet që i kanë instalu vet, institucione me njerëz të familjes së tyne”, ka thënë Aliu.
Protestuesit kanë vazhduar marshin nëpër sheshin e Qytetit në Ferizaj për t’u ndalur edhe para Stacionit të Policisë si dhe para Gjykatës Themelore të Ferizajt. Protesta ka përfunduar e qetë dhe pa incidente.
