Haradinaj: Një ditë para se GJND i tha ‘PO’ Pavarësisë, u thirra në Hagë, sot Kosova është më e fortë

Kryeministri në dorëheqje, Ramush Haradinaj, përmes një shkrimi të postuar në faqen e tij zyrtare Facebook ka folur për rëndësinë e datës 22 korrik kur Gjykata Ndërkombëtare të Drejtësisë (GJND) i tha po Pavarësisë së Kosovës.

Këtë vendim ai e quajti historik, teksa kujton se si një ditë më parë më 21 korrik të 2010 ai u thirr në Hagë në procesin gjyqësor. Ndërsa shton se tani kur ai është thirrur sërish në Hagë, Kosova është më e fortë se kurrë.

Postimi i tij i plotë në Facebook:

“Një nga datat më të rëndësishme të shtetësisë së Kosovës është edhe 22 korriku i vitit 2010, kur Gjykata Ndërkombëtare e Drejtësisë shpalli verdiktin se, Pavarësia e Kosovës është legjitime dhe e drejtë dhe nuk bie ndesh me të Drejtën Ndërkombëtare.

Ky vendim historik për vendin, konfirmoi themelet e pavarësisë tonë, të sovranitetit të shtetit dhe integritetit territorial. Për koincidencë, një ditë para vendimit të GjND-së, më 21 korrik, unë u thirra në Hagë, në procesin e dytë gjyqësor.

Sot, kur sërish thirrem në Hagë, në këtë përvjetor të nëntë, Kosova është më e fortë se kurrë, si shtet i pavarur, sovran, demokratik, unik, dhe i pandashëm dhe i përkushtuar në rrugën euro-atlantike”.