Rama: Kemi siguruar 500 mijë doza të vaksinës, një pjesë do t’ia ndajmë Kosovës

Kryeministri i Shqipërisë, Edi Rama, ka njoftuar se Shqipëria ka siguruar 500 mijë doza të vaksinës anti-COVID të kompanisë ‘Pfizer’, ndërsa një pjesë të kësaj sasie e ka premtuar edhe për Kosovën, njofton ALBAZONE MEDIA.

Nëpërmjet një adresimi në ditën e parë të vitit 2021,Rama tha se marrëveshja është zyrtarizuar dhe se dozat e para të vaksinës do të arrijnë gjatë këtij muaji.

Sipas tij, 10.750 dozat e para do të mbërrijnë në fillim të javës së tretë të janarit, 30.250 doza të tjera në shkurt, kurse të tjerat sipas planit.

“Kjo është nisja më e mirë e mundshme e këtij viti vendimtar të zmbrapsjes përfundimtare të këtij armiku të padukshëm”, tha Rama.

Kreu i Qeverisë së Shqipërisë në këtë adresim kritikoi BE-në që ka lënë anash vendet e Ballkanit në lidhje me furnizimin me vaksina anti-COVID.

Në këtë hall përfshiu edhe Kosovën, por tha se Shqipëria do t’i bëjë zgjidhje.

Do të ofrojë një sasi të vaksinave për të vaksinuar punëtorët shëndetësorë në Spitalin e Prishtinës.

“Nuk do t’ia kthejmë shpinën Kosovës duke e lënë në pritje. Nuk ia zgjidhin këtë hall, por do i ndihmojnë. Kosovës do t’i dhurojmë një sasi për bluzat e bardha në mënyrë që heronjtë e vijës së parë në Spitalin e Prishtinës të nisin në të njëjtën kohë vaksinimin me heronjtë tanë”, ka thënë Rama.

Ai tha se për këtë ka kontaktuar edhe institucionet kosovare në lidhje me numrin që kërkohet.

Për qytetarët e Shqipërisë, Rama tha se vaksina do të jetë falas.