Haradinaj përsëri ia thotë këngës, tani në Drenicë këndon vargjet “O ty Kosovë nuk të lëshojmë prej dore” (Video)
Partitë politike janë duke zhvilluar fushatën e tyre elektorale.
Përfaqësuesit e subjekteve politike si dhe kandidatët e tjerë për deputetë në legjislaturën e re të Kuvendit të Kosovës qytetarët kanë mundësi ti takojnë thuajse çdo ditë deri më 12 shkurt.
Gjithë këto ditë të njëjtit po i shfrytëzojnë në mënyrë maksimale që të bashkëbisedojnë me qytetarët dhe të paraqesin premtimet e tyre elektorale.
Ngjashëm ka vepruar edhe lideri i Aleancës për Ardhmërinë e Kosovës (AAK), Ramush Haradinaj i cili është edhe kandidat i hapur për president.
Haradinaj së fundi zhvilloi një tubim me qytetarët në një prej fshatrave të Drenicës.
Në një video-incizim të dërguar në lajmi.net, Haradinaj shihet në mesin e shumë banorëve të kësaj ane, por jo duke folur për politikë sepse i njëjti zgjodhi t’ia thotë këngës, në vend të fjalëve.
Haradinaj si shumë herë më parë edhe kësaj radhë vendosi të këndojë, anipse u kritikua disa herë radhazi për këtë gjë.
Në një deklaratë të dhënë më herët, Haradinaj pati thënë se këndimin e ka që nga koha e luftës, kur në orët e para të mëngjesit vendoste që përmes këngës t’i zgjonte udhëtarët e tij dhe të pozicionoheshin përballë armikut.
