Maqedoni: 75% e personave të pavaksinuar kanë antitrupa

Të dhënat nga analiza e testimit skrining për COVID-19 që e ka realizuar Ministria e Shëndetësisë, tregojnë se të testuarit që nuk janë vaksinuar, prania e anti-trupave lëvizë nga 75 deri 76 përqind, ndërsa te të testuarit që janë vaksinuar shkalla e anti-trupave lëvizë prej 85 deri 86%.

Këtë në një deklaratë për AIM e tha sot zv.ministri i Shëndetësisë Vlladimir Rendevski, i cili shtoi se këto të dhëna tregojnë se një numër i madh i personave që nuk janë vaksinuar, megjithatë kanë pasur kontakt me virusin, përcjell Telegrafi Maqedoni.

Ai gjithashtu theksoi se nëse është arritur imunitet kolektiv vendos Komisioni për Sëmundje Infektive në bazë të analizave.

Megjithatë, sqaroi Rendevski, parametri më i rëndësishëm është analiza e numrit të të sapoinfektuarve, të vdekurve dhe të hospitalizuarve dhe në bazë të kësaj rekomandohen masa epidemiologjike.

Ai theksoi se vaksinimi kundër Covid-19 është shtyllë për përmirësimin e sistemit imunitar./Telegrafi/