Daut Haradinaj: S’ka zgjedhje sivjet, koalicioni është stabil

Deputeti i Kuvendit të Kosovës nga radhët e Aleancës për Ardhmërinë e Kosovës, Daut Haradinaj, ka deklaruar se nuk do të ketë zgjedhje të parakohshme këtë vit.

Ai ka thënë se koalicioni qeverisës është stabil dhe duhet t’i përfundojë çështjet e hapura me Serbinë.

Megjithatë, Haradinaj ka deklaruar se opozita mund ta rrëzojë qeverinë kurdo që t’i ketë numrat.

“Përderisa ne nuk kemi as një temë të hapur brenda partnerëve të koalicionit unë e konsideroj këtë koalicion stabil. Jemi këtu dhe në çdo situatë që opozita i bënë numrat le të veprojë”, është shprehur Haradinaj për “Epoka e Re”.

Ai ka vlerësuar se AAK-ja është në situatën më të mirë të mundshme dhe, sipas tij, mobilizimi i strukturave dhe vendimet e qeverisë kanë bërë që kjo parti të ketë mbështetje të madhe popullore.

Daut Haradinaj nuk ka dashur ta komentojë vendimin e Gjykatës Kushtetuese për ekipin negociator, por ka thënë se është i nevojshëm uniteti i brendshëm karshi Serbisë.