Ruskovska: Ka filluar shqyrtimi i dokumentacionit për spitalin në Tetovë

“Prokuroria Themelore Publike për hetim të krimit të korrupsionit dhe krimit të organizuar të martën ka pranuar dokumentacionin për spitalin modular në Tetovë nga Byroja për furnizime publike, ndërsa dje pas oraës 14:00 është marrë edhe nga Ministria e Punës dhe Politikës sociale, kurse sot hetuesit filluan ta shqyrtojnë dokumentacionin”.

Këtë sot e deklaroi shefja e PTHP-së, Vilma Ruskovska duke u përgjigjur në pyetje të gazetarëve nëse kanë pranuar dokumentacionin dhe çfarë po hetohet.

“Sot filloi shqyrtimi i dokumentacionit dhe nuk kam informacione më konkrete”, tha Ruskovska.

E pyetur çfarë do të hetojë Prokuroria, Ruskovska potencoi se Prokuroria që drejton ajo është kompetente vetëm në pjesën për furnizimin publik dhe kjo do të kontrollohet nëse janë respektuar procedurat.

Në lidhje nëse kanë informacione për pranimin teknik, Ruskovska theksoi se nuk ka informacione për këtë, ndërsa specifikimin teknik e kanë në gjuhën angleze dhe menjëherë e kanë dërguar në PTHP Tetovë në mënyrë që ekspertët gjermanë të njoftohen.