Skandal diplomatik i ministres malazeze, i dërgon ftesë ministres së Kosovës me fusnotë
Antena M në Mal të Zi raporton se posedon një dokument me të cilin ministrja e Shoqërisë Digjitale, Tamara Srzentiq, i bën thirrje ministres së Ekonomisë në Kosovë, Artane Rizvanolli, që të merr pjesë në Samitin Digjital për Ballkanin Perëndimor që do të mbahet në Mal të Zi nga 11 deri në 13 tetori – duke iu referuar tërë kohën Kosovës me fusnotë, pavarësisht që ky shtet fqinj ka njohur pavarësinë e Kosovës.
Mali i Zi në dokumente zyrtare i referohet Kosovës me fusnotë, megjithatë ato vende që nuk e kanë njohur vendin tonë i referohen me fusnotë derisa ato që e kanë bërë një gjë të tillë i referohen si çdo shteti tjetër.
Megjithatë kjo nuk është hera e parë që Mali i Zi e bën këtë, pasi në dhjetor të vitit të kaluar ministria e Shëndetësisë së këtij vendi e kishte shkruar Kosovën me fusnotë.
Në ftesën e Srzentiqit që iu dërgua ministres Rizvanolli, Kosovës i referohen me fusnotë. E kjo fusnotë përsëritet edhe në programin e agjendës, përkatësisht kudo që përmendet Kosova – i referohen me fusnotë.
Në një kumtesë të qeverisë malazeze të lëshuar më 8 dhjetor të vitit të kaluar, sa i përket masave për luftimin e pandemisë së COVID-19, Kosovës i referohen me fusnotë.
E asokohe në qeverinë e Malit të Zi patën bërë me dije se bëhet fjalë për “një gabim teknik”. Kujtojmë që në vitin 2012 në Bruksel, ishte arritur marrëveshja mes Prishtinës dhe Beogradit rreth mundësisë së përfaqësimit të Kosovës në konferenca e nisma rajonale, ku Kosova do të përdorë fusnotën. /Telegrafi/
