Në restorantin e Kuvendit të Kosovës, pjatën plot mish deputetët e paguajnë 1.50 euro

Pjata kryesore, me 300 gramë mish në hell, kushton 1 euro e gjysmë në restorantin e Kuvendit të Kosovës.

Nga viti 2011, deputetët e Kuvendit të Kosovës marrin nga 5 euro për shpenzime ditore, përveç benefiteve tjera që i kanë, si kompensimi i shpenzimeve për udhëtim për deputetët që jetojnë jashtë Prishtinës.

Për këtë kishte vendosur Kryesia e Kuvendit, që përbëhej nga shefi, Jakup Krasniqi, e anëtarët Xhavit Haliti, Glauk Konjufca, Sabri Hamiti, Etem Arifi e Petar Miletiç.

Ndërkaq, kryesuesit të Kuvendit të Kosovës jo rrallë i bie t’i thërrasë për në seancë deputetët, sepse shpesh ata lirojnë seancën e shkojnë në restorantin e Kuvendit.

Në restorantin e Kuvendit, deputetët çmimet i kanë fort të volitshme, krahasuar me ato të tregut.

Një kafe espresso, që rëndom kushton 50-70 cent, për deputetët, në Kuvend kushton 30 cent. Po kaq është edhe çaji filtër, që në një lokal tjetër shitet deri në 1 euro.

E makiato e madhe, për ta është 40 cent, ndonëse qytetarët paguajnë nga 1 euro.

Veç nga 20 cent u kushton kafe kapuqino e qumësht me çokollatë apo bambi.

E nëse është i uritur ndonjëri ligjvënës, me 40 cent mund ta paguajë një supë viçi, e nëse nuk ia ka ënda këtë, mundet veç me 30 cent të paguajë një supë pule.

Pas supës, shkon sallata 200 gramësh, ku deputetit i kushton 50 cent.

200 gramë djathë-kaçkavall i kushton 40 cent.

E pjata kryesore, me 300 gramë mish në hell, kushton 1 euro e gjysmë. Kurse deputetët vegjetarianë mund të marrin 300 gramë shpageta apo makarona për vetëm 80 cent.

E arsyet pse janë çmimet më të lira në bufenë e kuvendit, për Klan Kosovën, i ka dhënë ekonomisti Remzi Smajli.

Shërbimet më të lira në restorantet e institucioneve publike janë nga fakti se: Në ofertat e tyre, në procedurë prokurimi, kanë ofruar çmime më të ulëta. Kanë klient konstantë gjatë tërë kohës. Shpenzime më të ulëta, sidomos në energji dhe qira”.

Marrja e shërbimeve të bufesë bëhet me tender dhe ofertuesi më i lirë e fiton atë.

Por, e njëjta është mbyllur përkohësisht në fund të vitit 2021, pasi pati ankesa edhe për shërbim të ujit, të prodhuar nga Serbia.