Kriza rrit çmimet e banesave në Maqedoni, në disa qytete metër katrori arrin në 2500 euro

Çmimi i banesave në Maqedoninë e Veriut po rritet në mënyrë ekstreme gjatë krizës, por duket se nuk ka shumë ndikim as në ofertë, as në kërkesë.

Ndërtesat e reja vazhdojnë të ndërtohen, ndërsa kërkesa për banesa të reja në pjesët atraktive të Shkupit, si dhe në qendrat turistike si Ohri dhe Struga nuk zbehet.

Në dy qytetet turistike, metër katrori për një banesë ka arritur deri në 2500 euro.

Statistikat e fundit konfirmojnë se oferta me apartamente ka përmbushur prej kohësh kërkesën, por pavarësisht kësaj, ende po ndërtohen dhe blihen apartamente të reja.

Mbi 307.187 ose 36.6% e banesave janë bosh, ndërsa 531.987 ose 63.4% janë të banuara, sipas të dhënave nga Censusi i fundit i vitit 2021 të Entit Shtetëror të Statistikave.

Një pjesë e apartamenteve janë liruar për shkak të largimit nga qyteti, ndërsa të tjerat janë blerë si investim.

Më së shumti banesa për “rezervë” janë blerë në kryeqytet – 59.300, kurse më atraktive janë komunat e Shkupit, Qendër dhe Karposh, ku janë mbi 20 mijë banesa pa qiramarrës.

Sipas statistikave, Ohri ka 17.820 banesa bosh, ndërsa në Strugë 10.153.

Në Manastir, nga ana tjetër, janë regjistruar 16.063 banesa të pabanuara.

Pavarësisht krizës, rritjes së çmimit të materialeve të ndërtimit, që çoi në një rritje të madhe të çmimit të shitjes së apartamenteve, vitin e kaluar pati një numër rekord të lejeve të ndërtimit të lëshuara.

Statistikat tregojnë se vitin e kaluar janë dhënë 4,069 leje ndërtimi, krahasuar me 2,837 në vitin 2020, kur kishte dy herë më shumë.

Shumica e ndërtimeve janë bërë në rajonin e Shkupit, ku janë dhënë 1,414 leje.

Në vitin 2020, për shembull, kishte vetëm 727 miratime.

Interesim për ndërtim ka pasur në rajonin e Pollogut ku janë dhënë 675 leje, për dallim nga viti 2020 kur janë dhënë 497 leje ndërtimi.

Nga numri i përgjithshëm i miratimeve, 2440 janë për ndërtesa të larta.