Gjukanoviq: “Ballkani i Hapur” i zhduk katër shtete, Bosnjë e Hercegovinën, Malin e Zi, Kosovën dhe Maqedoninë së Veriut

Presidenti i Malit të Zi, Milo Gjukanoviq, vazhdon ta kundërshtojë iniciativën rajonale “Ballkani i Hapur” – ani se kryeministri Dritan Abazoviq është shprehur në favor të saj.

Ai thotë se kjo iniciativë është nisur nga Serbia dhe ka për qëllim ndryshimin e kufijve dhe homogjenizimin etnik dhe fetar brenda shteteve të këtij rajoni.

“Bëhet fjalë për një skenar alternativ për të ardhmen e Ballkanit Perëndimor jashtë BE-së. Që nuk na duhet. Ne kemi nevojë për anëtarësim në BE. Ata që nuk e shohin rajonin tonë në Evropë, nuk shohin as demokraci multietnike në Ballkan. Atyre u pëlqen ideja e ndryshimit të kufijve, homogjenizimi etnik dhe fetar brenda shteteve të zgjeruara. Si zakonisht, çdo gjë nis tradicionalisht nga pala serbe, këtë herë në ‘botën serbe’. Dhe vazhdon, automatikisht, me të njëjtët zullumqarë të shtetit të madh”, ka thënë presidenti malazez për portalin “Autonomija”, transmeton Klankosova.tv.

Madje, Gjukanoviqi thotë se “Ballkani i Hapur” përfundon me zhdukjen e Bosnjë e Hercegovinës, Malit të Zi, Kosovës dhe Maqedonisë së Veriut, e për më tepër e shpie rajonin në luftë.

“Por është e sigurt se do të kishte përfunduar me luftë dhe disa gjenocide të tjera”, deklaron Milo Gjukanoviq.