Grabitën banesën e ish-zyrtares, pastruesja dhe i biri dyshohen edhe për 5 vjedhje të tjera

Nënë e bir, Rozeta dhe Havier Dobi, grabitën banesën e ish-shefes së kabinetit të ish-zëvendëskryeministrit Arben Ahmetaj, Alda Klosit.

Grabitja në banesën e cila ndodhet në Rrugën e Kosovarëve, ka ndodhur në datën 15 dhjetor.
Në banesën e nënë e bir u sekuestruan dje shuma të mëdha parash, ndërsa sot mbi 400 mijë euro, para dhe bizhuteri të vjedhura, të gjitha të fshehura në tubin e aspiratorit. Po ashtu, është zbuluar se ndaj pastrueses ka mbi 5 denoncime për raste të mëparshme ku thuhet se ka vjedhur në banesat ku ka punuar më herët.

HISTORIA:

Rozeta Dobi, 49-vjeçe ishte punësuar që t’u mirëmbante shtëpinë, por ajo në bashkëpunim me të birin, Havier Dobin, 23 vjeç, ka shpërdoruar besimin e dhënë nga pronarja e banesës dhe i ka vjedhur një shumë të konsiderueshme parash dhe sendesh me vlerë. 58150 euro, 7000 dollarë, 368 000 lekë të rinj, sende me vlerë (aksesorë floriri) të gjitha të grabitura nga nënë e bir.

Rozeta së bashku me të birin, pasi vodhën paratë në banesën në rrugën e Kosovarëve, një zonë e shtrenjtë në kryeqytet, kanë blerë edhe 2 makina Benz, të cilat 23-vjeçari i reklamonte në rrjetet sociale. Po ashtu policia ka sekuestruar edhe një makinë të tretë që përdorej nga i riu si dhe veshje të përdorura gjatë kryerjes së këtij krimi.

Eshtë zbuluar se ndaj pastrueses janë kryer edhe 5 denoncime të tjera, për vjedhje në banesa të mëparshme që ka qënë e punësuar./javanews

Njoftimi nga policia:

Tiranë/ Vijon operacioni policor i koduar “Inside”.
Gjenden dhe sekuestrohen edhe 404 800 euro, 8500 dollarë dhe aksesorë floriri, në banesën e dy autorëve të arrestuar gjatë operacionit ditën e djeshme.
Shërbimet e Komisariatit të Policisë Nr. 2, në vijim të operacionit policor të koduar “Inside”, gjatë të cilit u arrestuan shtetasit R. D. dhe H. D., nisur nga dyshimet e krijuara, mbi shumën e vjedhur në banesën në Rrugën e Kosovarëve, bazuar në inteligjencën informative dhe veprimet hetimore të thelluara kanë ushtruar rikontroll në banesën e shtetasve R. D. dhe H. D. (nënë e bir).
Gjatë kontrollit në banesë, shërbimet e Policisë gjetën të fshehura në tubin e aspirimit, 404 800 euro, 8500 dollarë dhe aksesorë floriri, të cilat u sekuestruan në cilësinë e provës materiale.
Materialet i kaluan Prokurorisë, për veprime të mëtejshme procedurale.