Tuqria nesër mban raundin e dytë të zgjedhjeve presidenciale

Türkiye nesër do të mbajë raundin e dytë të zgjedhjeve presidenciale, pasi asnjë kandidat nuk arriti pragun prej 50 për qind në raundin e parë të mbajtur më 14 maj, raporton Anadolu.

Votimi do të fillojë të dielën në orën 8:00 të mëngjesit me kohën lokale dhe do të përfundojë në orën 17:00.

Më shumë se 60 milionë shtetas turq janë regjistruar për të votuar, duke përfshirë 4,9 milionë votues për herë të parë.

Gjithsej 191.885 kuti votimi janë vendosur për votuesit në vend.

Sipas Këshillit të Lartë Zgjedhor të Türkiyes, më shumë se 1,89 milionë persona kanë votuar tashmë në misionet e huaja dhe portat doganore të Türkiyes, sipas të dhënave të së enjtes.

Votimi në përfaqësitë diplomatike përfundoi të mërkurën, ndërsa votimi do të vazhdojë në portat doganore deri në orën 17:00 të dielën.

Në zgjedhjet e 14 majit, gjithsej 1.839.470 shtetas turq jashtë vendit votuan për zgjedhjet presidenciale dhe ato parlamentare.

Miliona votues shkuan në kutitë e votimit më 14 maj për të zgjedhur presidentin e vendit dhe anëtarët e parlamentit.

Aleanca Popullore e Erdoğanit fitoi shumicën në parlamentin prej 600 anëtarësh, ndërsa gara presidenciale shkoi në raundin e dytë pasi asnjë kandidat nuk mori shumicën e thjeshtë, ose më shumë se 50 për qind të votave. Megjithatë, Erdoğan kryeson me 49,52 për qind.

Në balotazh, Erdoğan do të përballet me Kemal Kılıçdaroğlun, kreun e Partisë Republikane Popullore (CHP) opozitare dhe kandidatin e përbashkët të Aleancës Kombëtare, e cila përbëhet prej gjashtë partish opozitare.