Ushtria izraelite hedh gaz lotsjellës në hyrjen e urgjencës në një spital të Bregut Perëndimor
Ushtria izraelite hodhi gaz lotsjellës në një spital gjatë bastisjeve në qytetin Tulkarem në Bregun Perëndimor të pushtuar, raporton Anadolu.
Ushtarët izraelitë u tërhoqën nga qyteti Tulkarem pasi vranë 7 palestinezë.
Ministria palestineze e Shëndetësisë publikoi pamje të momenteve kur ushtria izraelite hodhi gaz lotsjellës në hyrjen e urgjencës të Spitalit Shtetëror në Tulkarem gjatë bastisjes. Ministria njoftoi se pacientët dhe ekipet mjekësore janë prekur nga gazi.
Gazetarët e Anadolu në vendngjarje panë një autoambulancë që vepronte në rajon dhe ishte ndalur nga një xhip ushtarak i blinduar i ushtrisë izraelite dhe ushtarët ishin në kërkim të ambulancës.
Ushtria izraelite ka kryer bastisje intensive në shtëpi dhe pika të ndryshme në qytetin Tulkarem dhe kampin e refugjatëve Tulkarem në mëngjes.
Buldozerët e ushtrisë izraelite, të cilët erdhën në rajon të shoqëruar nga ushtarë, shkaktuan dëme të mëdha në infrastrukturën në rrugën El-Medaris, një nga arteriet kryesore në rajon dhe me pajisjet e ndërtimit shkatërruan një pjesë të Universitetit të Kudsit në qytet. Një mjet ajror pa pilot i armatosur i ushtrisë izraelite sulmoi kampin nga ajri.
Ministria palestineze e Shëndetësisë njoftoi se ushtarët izraelitë vranë 8 palestinezë, 7 në Tulkarem dhe 1 në Al-Khalil dhe plagosën 12 palestinezë, 4 prej tyre rëndë, gjatë bastisjeve në Bregun Perëndimor.
Pas bastisjeve dhe përleshjeve që vazhduan gjatë gjithë ditës, ushtria izraelite u tërhoq nga rajoni. Numri i palestinezëve të vrarë nga forcat izraelite dhe kolonët hebrenj në Bregun Perëndimor dhe Kudsin Lindor që nga 7 tetori është rritur në 196.
