Gara më prestigjioze e matematikës për vajza do të mbahet në Kosovë, Kurti jep detaje
Kryeministri i vendit, Albin Kurti ka bërë të ditur se garat për matematikë evropiane për vajza do të organizohen në Kosovë në vitin 2025.
Për këtë rast, Kurti përmes një postimi në llogarinë e tij në Facebook, ka thënë se viti 2025 do të jetë vit i matematikës në Kosovë, përcjell AlbaZone Media.
Postimi i plotë:
Viti 2025 do të jetë viti i matematikës në Kosovë
Kjo do të jetë logoja zyrtare e Olimpiadës Matematike Evropiane për Vajza – EGMO 2025, e cila do të organizohet në Kosovë prej datës 11 prill 2025 deri më datën 17 prill 2025.
EGMO është gara më prestigjioze ndërkombëtare e matematikës për vajza që ka për qëllim t’i inkurajojë vajzat që të merren me matematikën dhe zbatimin e saj. Gara zhvillohet çdo vit në një vend të ndryshëm të Evropës me pjesëmarrje të rreth 60 shteteve, duke i përfshirë edhe shtetet jo-evropiane që marrin pjesë si mysafirë.
E falënderojmë komunitetin e matematikanëve shqiptarë, Shoqatën e Matematikanëve të Kosovës dhe të gjitha organizatat e tjera për angazhimin e tyre të pandërprerë në promovimin dhe avancimin e matematikës në Kosovë. Puna e tyre ka ndikuar thellësisht në avancimin e matematikës në Kosovë, duke ofruar mundësi dhe mbështetje profesionale të rinjve tanë për t’i shfaqur talentet e tyre matematikore në organizimet më prestigjoze ndërkombëtare.
EGMO 2025 do të organizohet me mbështetjen e Qeverisë së Kosovës, komunitetit të matematikanëve shqiptarë, Shoqatës Matematikanëve të Kosovës dhe organizatave e donatorëve të tjerë vendorë dhe ndërkombëtarë.
