U godit nga një anije e madhe, momenti kur shembet ura në SHBA, dyshohet për 20 viktima (Video)

Një urë në Baltimore të Shteteve të Bashkuara është shembur në orët e para të mëngjesit të së martës. Shkak për shembjen e urës Francis Scott Key është bërë goditja që ajo mori nga një anije e madhe.

Të gjitha mjetet dhe shoferët që po qarkullonin në urë në ato momente kanë përfunduar në ujë.

Mediat e huaja kanë publikuar dhe momentin e shembjes së urës, ku brenda pak minutash struktura bie e gjitha në ujë.

Anije e madhe e cila u përplas me urën shpërtheu në flakë dhe u fundos.

“Të gjitha korsitë nga të dyja drejtimet janë mbyllur për shkak të incidentit në I-695 Bridge”, thanë autoritetet e transportit në Mariland.

Kryetari i Baltimore, Brandon Scott, tha se ekipet emergjente janë në vendin e ngjarjes dhe se kanë nisur operacionet e shpëtimit.

Ekipet e shpëtimit janë duke i kërkuar së paku shtatë njerëz për të cilët besojnë se janë në ujë, tha Kevin Cartëright, drejtor për komunikim në Departamentin e Zjarrfikësve në Baltimore.

“Përqendrimi ynë tani është të tentojmë t’i shpëtojmë këta njerëz”, tha Cartwright.

*****

20 qytetarë dyshohet të jenë mbytur pas shembjes së Urës Francis Scott Key në Baltimore të SHBA-së.

“Ne jemi duke menaxhuar një incident me viktima masive”, tha Kevin Cartwright, drejtor i komunikimit të Departamentit të Zjarrfikësve të Qytetit Baltimore.

“Fatkeqësisht, ne e kuptojmë se ka deri në 20 persona që mund të jenë në lumin Patapsco si dhe automjete të shumta”, tha ai për CNN.

Cartwright tha se ata po punojnë me Rojet Bregdetare të SHBA dhe një ekip zhytësish janë në lumë për operacione kërkimi dhe shpëtimi, me temperatura -1 °C rreth portit.

Ura Francis Scott Key në Baltimore u shemb herët në mëngjes pasi u godit nga një anije e madhe.

Ura 1.6 milje me katër korsi shtrihet mbi lumin Patapsco dhe shërben si kalimi më i jashtëm i portit të Baltimores dhe një lidhje thelbësore me Rripin e Baltimores.

Ura, e cila u hap në vitin 1977, mban emrin e autorit të himnit kombëtar të SHBA, “The Star-Spangled Banner”, sipas Autoritetit të Transportit të Maryland në faqen e saj të internetit.

Francis Scott Key besohet se ishte ulur pranë vendit të urës, ndërsa dëshmoi bombardimin e Fort McHenry në 1814, duke e frymëzuar atë të shkruante fjalët e himnit kombëtar të SHBA.