Akademia Shqiptare për Mickoskin është temë e mbyllur, ASH e Ziadin Selës: VLEN-i nuk guxon t’i përgjigjet padronit të tyre

Aleanca për Shqiptarët, krahu i Ziadin Selës ka pyetur koalicionin shqiptar në qeveri VLEN se ku mbeti themelimi i Akademisë Shqiptare?

Ata shtojnë se VLEN-i nuk guxon t’i përgjigjet Mickoskit për çështjen e Akademisë sepse u bënë pjesë e qeverisë së re si humbësa.

Reagimi i plotë:

Ku mbeti “Akademia Shqiptare”, a ua mbylli gojën Mickoski!?

Ka javë që drejtuesit e koalicionit vLEN, kanë heshtur tërësisht temën për institucionalizimin e Akademisë së Shqiptarëve për shkencë, kulturë dhe art. Nga ana tjetër, sot padroni i tyre, Hristijan Mickoski, këtë temë e shpalli të mbyllur dhe të dështuar, duke deklaruar se këtë ua ka thënë edhe në fytyrë përfaqësuesve shqiptarë në Qeveri, duke i poshtëruar se nuk guxojnë as ta përmendin.

Pyesim publikisht shqiptarët që pa legjitimitet hyjnë në Qeveri, a kanë përgjigje për Mickoskin, ku ngeli Akademia e trumbetuar, a është e vërtetë se ua ka mbyllur gojën, si dhe a guxojnë t’i përgjigjen Mickoskit.

Paraprakisht ju bëjmë thirje që të mos shtrembërojnë të vërtetën dhe të mos luajnë me lojë fjalësh, por t’i përgjigjen direkt padronit të tyre. Nënshtrimi i tyre dëshmon pafuqinë e tyre si pasojë e mungesës së legjitimitetit, ndërsa poshtrimi para gjithë opinionit është poshtrim edhe për shqiptarët derisa ata ende thiren si përfaqësues të shqiptarëve në Qeveri.