BE përshëndet marrëveshjen Etiopi-Somali, vlerëson “rolin e rëndësishëm” të Türkiyes
Bashkimi Evropian (BE) ka përshëndetur për zgjidhjen e mosmarrëveshjes midis Etiopisë dhe Somalisë, duke vlerësuar “rolin e rëndësishëm” të Türkiyes në këtë proces, raporton Anadolu.
Zëdhënësi i BE-së për Punët e Jashtme, Anouar El Anouni, duke u përgjigjur në pyetjen nga Anadolu gjatë një konferencë për media, komentoi Deklaratën e Ankarasë të nënshkruar dje midis Etiopisë dhe Somalisë, me Türkiyen që veproi si lehtësuese.
“BE-ja përshëndet deklaratën e rënë dakord në Ankara më 11 dhjetor”, tha El Anouni. Ai shtoi se rezoluta thekson rëndësinë e respektit të ndërsjellë dhe dialogut në uljen e tensioneve në të gjithë Afrikën.
El Anouni përsëriti mbështetjen e BE-së për “unitetin, sovranitetin dhe integritetin territorial” të Somalisë dhe Etiopisë, në përputhje me “parimet në të drejtën ndërkombëtare”.
“Ne njohim rolin e rëndësishëm të marrë nga Republika e Türkiyes në arritjen e kësaj marrëveshjeje”, tha El Anouni, duke pranuar rolin kyç të Türkiyes për lehtësimin.
Ai pohoi gatishmërinë e BE-së për të mbështetur përpjekjet e mëtejshme dhe iniciativat ndërmjetësuese.
– Deklarata e Ankarasë
Dje, presidenti turk, Recep Tayyip Erdoğan, priti në takim në Ankara homologun e tij somalez, Hassan Sheikh Mohamud dhe kryeministrin etiopian, Abiy Ahmed, para se të tre udhëheqësit të shpallin paktin e arritur.
“Ne kemi bërë hapin e parë drejt një fillimi të ri të bazuar në paqe dhe bashkëpunim midis Somalisë dhe Etiopisë”, tha presidenti Erdoğan në një konferencë të përbashkët për media në kryeqytetin turk me liderët somalez dhe etiopian.
Drejtoria e Komunikimeve e Türkiyes tha se liderët e Somalisë dhe Etiopisë “riafirmuan respektin dhe përkushtimin e tyre ndaj sovranitetit, unitetit, pavarësisë dhe integritetit territorial të njëri-tjetrit si dhe parimet e mishëruara në të drejtën ndërkombëtare, Kartën e OKB-së dhe Aktin Kushtetues të Unionit Afrikan”.
Dy vendet e Afrikës Lindore kanë qenë në mosmarrëveshje që nga 1 janari kur Etiopia arriti një marrëveshje me rajonin e shkëputur somalez Somaliland për të përdorur portin e saj Berbera në Detin e Kuq. Türkiye ka punuar për t’i dhënë fund tensioneve midis dy vendeve.
