Ndërron jetë pacienti që ishte në gjendje kritike! Shkon në 60 numri i viktimave të tragjedisë së Koçanit
Numri i viktimave të rastit tragjik në Koçan shkoi në 60-të. 29-të vjeçari Aleksandar Karadakovski, njëri prej 4 pacientëve të cilët ishin në gjendje kritike ndërroi jetë. Ai po trajtohej në Lituani.
“Bëhet fjalë për Aleksandar Karadakovski, i cili është 29 vjeçar dhe shëroheshte në Lituani. Dua të shpreh ngushëllimet e mia të sinqerta ndaj familjes. Lajme të mira që janë për sot se gjthsej kanë mbetur prej 100-98 pacientë që u trajtuan, mbeten vetëm 78 pacientë që trajtohen këtu në Shkup dhe jashtë vendit. Në Shkup janë 14 pacientë prej të cilëve 5 sot lëshohen në shtëpi, se janë në gjendje të mirë dhe mbeten vetëm 9 pacientë që shërohen në Shkup. Jashtë shtetit mbeten 69 pacientë pasi që sot 6 kthehen”, tha Taravari.
Drejtori i spitalit të Qytetit Nebojsha Nastov njoftoi i ndjeri ka pasur djegie të rënda në kokë, qafë dhe gjymtyrë.
“Është dëmtuar një pjesë e madhe e organeve të frymëmarrjes, në fund të kësaj ka ardhur në përkeqësimin e gjendjes”, deklaroi Nastov.
Prokuroria Themelore Publike-Koçan e ndërpreu procedurën ndaj Aleksandar Karadakovskit, i cili ishte menaxhues i diskotekës se djegur.
“Duke qenë se viktima e 60-të e sotme nga zjarri katastrofik në Koçan është një person i cili paraprakisht ka qenë i përfshirë me urdhër për zhvillimin e procedurës hetimore, në cilësinë e menaxherit të personit juridik, Prokuroria Themelore Publike Koçan do të lëshojë urdhër për ndërprerjen e procedurës hetimore për të, pas marrjes së dokumentacionit zyrtar për shkakun e vdekjes”, thotë Prokuroria.
Pas vdekjes së Karadakovskit, i cili ishte një ndër pacientët në gjendje kritike, Taravari tha se edhe 3 pacientë tjerë që po trajtohen jashtë vendit janë në gjendje të rëndë.
