Tensione në Atlantik! SHBA sekuestron cisternën ruse
Sekuestrimi i anijes ndodhi në mes të Atlantikut, pas një ndjekjeje të nisur në ujërat e Antileve. Nuk është një film mbi piratët e Karaibeve, por një përshkallëzim në përballjen mes Uashingtonit dhe Moskës për “arin e zi” të Karakasit. Marina amerikane ka sulmuar cisternën Bella 1, e cila pasi u nis nga Venezuela dy javë më parë, duke shkelur bllokadën detare të urdhëruar nga Donald Trump, ndryshoi emrin në Marinera dhe ngriti flamurin rus. Një ndërhyrje me tension të lartë, sepse Kremlini dërgoi një skuadër detare në ndihmë të cisternës: sipas Wall Street Journal po afrohej edhe një nëndetëse bërthamore.
Dënimi i menjëhershëm i Moskës erdhi përmes një note të Ministrisë së Transportit.
“Në ujërat ndërkombëtare ekziston liria e lundrimit dhe asnjë shtet nuk ka të drejtë të përdorë forcën kundër anijeve të regjistruara rregullisht në juridiksionin e kombeve të tjera”. Deputeti i partisë së Putinit, Rusia e Bashkuar, Andrei Klishas, e quajti “një akt piraterie”. Por Sekretari i Luftës, Pete Hegseth, përsëriti: “Shtetet e Bashkuara vazhdojnë të imponojnë bllokadën ndaj të gjitha anijeve të flotës së hijes që transportojnë ilegalisht naftë venezueliane për të financuar aktivitete të paligjshme, duke vjedhur popullin venezuelian. Do të lejohet vetëm tregtia e energjisë legjitime dhe ligjore, siç është përcaktuar nga SHBA”.
Në Karaibe u ndalua edhe një tjetër anije, Sophia, e nisur dy ditë më parë nga një port venezuelian.
Bella 1 ishte përfshirë në listën e “flotës së hijes” të përdorur nga Moska për kontrabandën e naftës: më parë kishte kryer udhëtime mes Iranit, Venezuelës dhe Kinës. Ajo i shpëtoi një sulmi të parë të marinës amerikane më 20 dhjetor në ujërat ndërkombëtare. Një helikopter kishte tentuar të zbriste një skuadër komandosh, ndërsa një patrullues i Gardës Bregdetare iu afrua. Kapiteni refuzoi lejen për inspektim dhe me manovra të shpejta u largua. Më pas, ekuipazhi pikturoi një flamur të madh rus dhe u zbulua ndryshimi i kombësisë: nga anije e Guajanës ishte bërë pjesë e flotës së Moskës, e regjistruar në qytetin e Soçit.
Anija fiksoi transmetuesin e pozicionit dhe mori kurs drejt Europës, duke treguar destinacionin Shën Petersburg. Pas saj qëndroi një njësi e Coast Guard, ndërsa avionë zbulues të marinës amerikane e mbikëqyrën disa herë. Nga bordi u filmua ndjekësi amerikan dhe pamjet u transmetuan nga kanali Russia Today: një mënyrë tjetër për të nënvizuar mbrojtjen e Kremlinit. Më 1 janar u riaktivizua sinjalizuesi: ishte afruar pranë Irlandës.
Situata u komplikua më tej, pasi gjatë kapjes së Nicolás Maduro, 16 cisterna të tjera u nisën nga portet venezueliane. Të paktën dy përdorën të njëjtin mekanizëm juridik: pronësi e re dhe flamur rus. Një sfidë që Shtëpia e Bardhë nuk e toleroi, duke urdhëruar aksionin kundër Marinera.
Një helikopter u vendos mbi kuvertën e cisternës, duke zbritur një ekip të vogël komandosh, ndërsa anija e Gardës Bregdetare iu afrua. Fotoja e aksionit u shpërnda sërish nga Russia Today: tregonte një helikopter “Little Bird”, i përdorur vetëm nga forcat speciale. Në këmbët e tij shiheshin të paktën katër komando gati të zbrisnin me litarë të gjatë: ndoshta pararendësit e një grupi të dytë të ardhur me një tjetër helikopter. Gjithçka ndodhi në ujërat ndërkombëtare pranë Irlandës Veriore, mes Islandës dhe Skocisë: ditët e fundit në bazat britanike kishin zbritur avionë dhe helikopterë të skuadronit 160 Night Stalkers, që menaxhon operacionet e forcave speciale. Edhe zbulues britanikë kontribuan në mision: ka gjasa që tani Marinera të transferohet në një port anglez.
Burime anonime të Pentagonit konfirmuan operacionin për Reuters, duke specifikuar se pranë ishin njësi ushtarake të Moskës, përfshirë një nëndetëse bërthamore. Ata shtuan se një tjetër cisternë, Sophia M, ishte ndaluar në ujërat e Amerikës Latine: një grup komando u ul natën nga një helikopter Blackhawk. Nuk është e qartë nëse ishte një nga 16 cisternat e nisura drejt Rusisë, por ishte përfshirë në listën e sanksionuar për kontrabandë nafte.
Pas më pak se gjysmë ore, një zyrtar i administratës amerikane deklaroi se Marinera ishte ndaluar. Dje Trump njoftoi se SHBA kishin arritur një marrëveshje me presidencën e re venezueliane për të blerë naftë në vlerë dy miliardë dollarë. Për Rusinë kjo do të ishte një disfatë përfundimtare, që do të shënonte humbjen e aleatit kryesor në Amerikën e Jugut: një goditje e dytë ndaj strategjisë së saj globale të influencës, pas përfundimit të regjimit sirian të Assad-it një vit më parë, që i kishte privuar Moskës bazat në Mesdhe.
